PN APROVA REJOLUSAUN LUTA DEFENDE SOBERANIA MARITIMA

DILI - Parlamentu Nasional (PN), Segunda (4/4), aprova tan rejolusaun ho númiru 26/3 hodi fó apoiu ba aktus ne’ebé estadu liuhosi governu no movimentu popular sira luta ba negosiasaun liña  fronteira marítima  Timor Leste ho Austrália.

Rejultadu votasaun a favor 45, kontra 0 no abstensaun 0.

Prezidente  PN Interinu, Adérito  Hugo da Costa, esplika, rejolusaun ida ne’e kontinuasaun hosi rejolusaun ne’ebé PN aprova uluk iha tinan 2014 hodi fó apoiu liu tan ba governu no movimentu popular, sosiadade Timor Leste tomak kontribui liu hosi manifestasaun. 

“Manifestasaun la’ós  de’it iha Dili maibé iha munisípiu    hotu-hotu, hosi nivel sosiadade sivil, igreja veteranus, konviksoens relijiozu sira hotu, solidaridade internasional, akadémiku, polítika  sira la’ós  de’it iha rai laran mais iha rai liur sobre pozisaun Timor Leste nian ba liña fronteira marítima,” Hugo hatete.

Iha fatin hanesan, Prezidente  Bankada FRETILIN, Aniceto Guteres, reforsa tan katak, pontu prinsipal hosi rejolusaun ne’e maka atu reafirma pozisaun estadu Timor Leste nian hodi hala’o negosiasaun ho governu Austrália.

“Ita fó tan apoiu inkondisional ida ba governu Timor Leste ne’ebé reprezenta estadu i Konsellu Delimitasaun Fronteira ho sira nia ekipa, fó forsa ba sira atu hala’o negosiasaun hamutuk ho advesáriu  governu Austrália,” afirma Aniceto iha plenária.

Aleinde ne’e Xefe  Bankada PD, Maria Lourdes Besa hatete, pertenente teb-tebes rejolusaun ida ne’e.

“Ida ne’e kontinuasaun ba rejolusaun ne’ebé ita halo antes. Ita halo rejolusaun ida ho situasaun ida. Entertantu iha ona evolusaun tantu hosi ita nia parte nomeia ona resposavel ida ba iha ekipa no iha tan asoens sira seluk no mós hosi parte Austrália nian ne’ebé hatete ona katak seidauk dispunivel. Ne’ebé ha’u hanoin katak importante teb-tebes ita nafatin kontinua atu hatur ita nia pozisaun inkonsonansio ho governu no mós sosiadade sivil ho veteranus,”nia dehan.

Aleinde ne’e mós  Xefe  Bankada CNRT, Natalino dos Santo hatete rejolusaun ida ne’e atu halo afirmasaun fila fali ba vontade povu tomak nian ne’ebé to’o agora Timor Leste ukun rasik a’an ona mais seidauk iha soberanu lolos.

“Tanba ida ne’e maka ita iha direitu atu ezije para bainhira soberanu ne’e bele hatur lolos,”nia dehan.

Nune’e mós, Xefe  Bankada Frente Mudansa, José  Luis Guteres hatete, ho rejulusaun ida ne’e bele fó apoiu tomak ba governu em-partikular Xefe  Negosiador, Maun Xanana para halo negosiasoens ho Austrália i lori negosiasaun ne’e ba hetan susesu.

Taur Apoiu Xanana

Entretantu Prezidente Repúblika (PR), Taur Matan Ruak, apoiu eis Primeiru Ministru (PM) Xanana Gusmão ne’ebé governu fó fi’ar  sai xefe missaun espesiál ba negosisaun fronteira marítima ho Austrália.

“Governu hili ita nia maun boot Xanana hodi lidera, ha’u deseja ba nia em nome do nasaun susesu iha nia lideransa ida ne’e i ha’u fi’ar  katak nia iha kapasidade para lidera,” Prezidente Repúblika (PR), Taur Matan Ruak informa ba jornalista sira iha suku, postu administrativu Bobonaro, munisípiu  Bobonaro, Domingu, (03/04) hafoin vizita suku 12 iha munisípiu  Likisa.

Xefe estadu lori estadu no povu tomak fó apoiu tomak hodi halo negosiasaun ba fronteira marítima nian tanba fronteira marítima ne’e parte ida soberania Timor-leste nian ne’ebé timoroan iha direitu ba soberania ne’e.

“Timor-Leste apoiu tomak tanba ne’e direitu ita nian, direitu Timor-Leste nian, ha’u triste oituan kuandu rona timoroan balun tau em dúvidas kona-ba Prezidente nia vontade atu defende soberania. Iha Timor ne’e timoroan oituan de’it bele sura ho liman mak bele halo liu ha’u ba timor, i sira barak ne’e ko’alia mas ibun mak boot,” dehan PR Taur.

Taur subliña, Timor-Leste tenke  prepara-an di’ak liu tan ho intelijénsia liu tan, sabedoria, buka solusaun ba problema ne’ebé mak Timor-Leste infrenta ho nasaun boot viziñua hanesan Austrália.

“Kazu ida ne’e hanesan fali timor halimar oituan horsida ita dehan osan mak uluk depois mak ita hakarak rai mak uluk tan, ne’ebé imi hatene ha’u militar, ha’u foin mak mai polítika ne’ebé ha’u haré  ita nia polítika ne’e kapás mas hatete  dehan gampan ka fasil ne’e bosok, rezolve fasil ne’e bosok, sé  mak kria espetativa ida ne’e nia bosok. Hatete  dehan imposivel ne’e mós bosok, agora hatete  dehan la fasil ne’e signifika Timor-Leste rekoinese katak Austrália  nia hanoin  lahanesan ita,” dehan PR Taur.(jos/dgx)

Timor Post