JSMP: Produtividade Servisus Tribunal Hat Hatudu Progressu Diak

Diretor Ezekutivu organizasaun Judicyal System Monitoring Program (JSMP), Luis Oliveira Sampaio, rekonese produtividades servisus tribunal munisipal hat hatudu duni progressu diak, tanba konsege halo julgamentu ba kazus ho numeru ne’ebe bo’ot.

Hanesan kazu korupsaun iha 2015, nia dehan, Tribunal Munisipal Dili (TMD) konsege julga kazu korupsaun hamutuk 20, kazus neen hetan ona desizaun enkuantu seluk sei prosesu hela.

“Iha  2014, tribunal julga deit kazu korupsaun hamutuk 14, maibe iha 2015 sira julga kazu korupsaun 20, ne’e progresus ne’ebe mak tribunal sira atinji,” Diretor Ezekutivu JSMP Sampaio hateten, iha Dili.

Iha 2015, nia dehan, Tribunal Rekursu konsege julga kazu hamutuk 75, TMD julga kazu krimi hamutuk 1256 e kazu sivil hamutuk 210.

“Husi kazu hirak ne’e, ami konsege monitoriza deit kazu 482,” nia informa.

Enkuantu iha Tribunal Munisipal Baucau (TMB), nia dehan, konsege julga kazu krimi hamutuk 555 e kazu sivil hamutuk 45, nune’e mos iha Tribunal Minisipal Suai (TMS) julga kazu krimi hamutuk 270 no kazu sivil 20.

No iha Tribunal Regiaun Espesial Oe-Cusse, nia dehan, sira julga kazu krimi 234 no kazu sivil 19, total kazus 253 . “Ami konsege monitoriza kazu hamutuk 136,” nia hateten.

Nia hateten, tribunal hat ne’e mos halo julgamentu ba kazu violensia domestika hamutuk 564, kazu violasaun seksual 102, violasaun seksual hasoru labarik 20 inklui abuzu seksual 40.

Iha parte seluk Deputada Ana Ribeiro, apresia ho progressu servisus tribunal muniisipal hat nian, tanba ne’e husu ba governu atu kria kondisaun ne’ebe diak liu, nune’e funsionamentu tribunal bele la’o diak liu tan iha future.

“Kazu barak mak sira konsege julga ba tinan ida, ne’e progressu ne’ebe diak tebes,”nia apresia.

Alende ne’e, nia mos husu ba governu atu trasa ona planu hodi harii mos tribunal iha munisipiu sira seluk, nune’e povu hotu bele asesu ba justisa formal.

The Dili Weekly