Prezidente
eleitu Filipina, Rodrigo Duterte, laapoiu ezekusaun estrajudisiál, informa iha
horisehik ninia portavós, iha resposta ba krítika responsável no organizmu
Nasoins Unidas nian.
"Prezidente eleitu laapoia - labele - no nunka apoia ezekusaun estrajudisiál,
ne’ebé kontra lei ", hatete Salvador Panelo.
Portavós ne’e hatutan tan katak Duterte "latolera" assassíniu "jornalista ka kualkér sidadaun seluk".
Salvador Panelo konsidera katak responsável Nasoins Unidas, inklui sekretáriu-jerál, Ban Ki-moon, hetan informasaun lalaoos bainhira kondena Duterte tamba, aparentemente, tolera omisídiu ba jornalista sira no apoia ezekusaun estrajudisiál.
Iha diskursu Nova Iorque nian kuarta-feira ne’e, Ban Ki-moon hatete " perturbadu tebes" ho observasaun Duterte ninian,liliu, kona-ba komentáriu justifikasaun assassíniu ba jornalista sira.
Nune’e moos relatór ONU nian kona-ba ezekusaun sumáriu, Christof Heyns, no promosaun iha liberdade expresaun, David Kaye, segunda-feira liubá kritika deklarasaun Rodrigo Duterte.
Heyns no Kaye, hanesan relatór espesiál kona-ba ezekusaun estrajudisiál, sumária ka arbitrária no relatór espesiál ba promosaun no protesaun direito ba liberdade iha opiniaun no espresaun, enkoraja Duterte atu hakotu"ho lalais" diskursu sira ne’ebé provoka violénsia.
Duterte, ho tinan 71, manán eleisaun prezidensiál iha maiu, atrai eleitoradu ho diskursu ba problema sentrál rua iha nasaun, kriminalidade no kiak, primeiru hosi sira ne’e maka promote atu rezolve oho ema kriminozu millaun resin.
Iha semana kotuk, nia afirma katak reporter sira, "tamba deit sira ne’e jornalista, laós livre atu oho".
Duterte sita kazu Jun Pala, ne’ebé hetan oho iha 2003.
"Ha’u lakohi diminui ninia memória, maibé nia oan ida hosi inan ne’ebé podre. Merese duni", nia afirma.
Deklarasaun ne’e halo ta’uk atu mosu tan asasínu ba traballadór iha meius komunikasaun social nian.
"Mensajen ida ho natureza ne’e hamosu diretamente violénsia no asasínu, iha nasaun ne’ebé konsidera perigu liu ba jornalista sira", deklara relatór nain rua ONU nian iha komunikadu.
Heyns no Kaye konsidera deklarasaun sira ne’e" irresponsável tebes no imprópria" hosi líder polítiku ida, liliu ba ema ida ne’ebé besik atu assume prezidénsia nasaun ida nian.
Gabinete Duterte informa ona, durante iha semana ne’e, katak ninia deklarasaun bazeia ba iha kontextu no prezidente tuir bele proteje direitu traballadór meius komunikasaun sosiál ninian no "prosesa asassinu ba jornalista sira".
Repórter nain hitu hetan oho iha Filipina iha 2015, tuir Federasaun Internasionál Jornalista, iha nia relatóriu refere nasaun aziátiku ida ne’e sai segundu neebé asasinu jornalista dezde 1990, tuir fali maka Irake.
SAPO TL ho Lusa
Sem comentários:
Enviar um comentário