Projetu Tasi Mane Laiha Serteza

Saída maka empata projetu tasi mane paradu hela, parlamentu sei bolu parte kompetente hosi Governu atu presta deklarasaun iha parlamentu.

Projetu tasi mane ne’ebé Governu deside hari’i iha Suai, Betano, no Viqueque, tuir Diretór Ezekutivu Organizasaun Naun Governamentál (ONG), Luta Hamutuk, Mericio Akara katak, projeitu ne’e laiha serteza tanba oras ne’e daudaun infraestrutura iha área ne’ebá la la’o.

“Paling foin book maka aeroportu no atu book tan maka auto Estrada. Nune’e ita laiha serteza tanba ita seidauk haree buat ruma iha nível planu ninian. Dehan halo buat ruma, maibé ita ba laiha buat ida. Dezenvolvimentu mós la la’o tan,” nia dehan iha nia serbisu fatin Farol, Dili,  Tersa (07/06/2016).

Nia afirma, uluk kedas sira ko’alia, tanba ne’e mega projetu ne’ebé ita hotu nia hakarak ne’ebé atu fó impaktu pozitivu ba ekonómia rai laran no sai fatór ida ne’ebé bele kontribui rendimentu di’ak ba nasaun alein de hosi fundu mina rai.

Maibé, problema ne’ebé sira observa maka projeitu ne’e la la’o, no infraestrutura ne’ebé sira planu atu halo mós la la’o, marka pasu hela. Ne’eduni, tuir nia agora sedu liu sé ita dehan fó benefísiu ka lae? tanba seidauk haree ho matan sa’ida maka halo ona iha ne’ebá.

Nia mós rekomenda ba parte kompetente, atu publika estudu biabilidade atu nune’e bele haree. No liu-liu, sé bele kada fulan tolu (3) Parlamentu Nasionál aprezenta ninia progressu ne’e to’o iha ne’ebé ona.

 Iha parte seluk, Minístru Petróleu Rekursu Minerais, Alfredo Pires katete projetu tasi mane ne’e iha partes ne’ebé oi-oin. Kona-ba aeroportu Suai, nia afirma katak, Obras Públikas maka kaer, no mós auto estrada ne’ebé iha Obras Públikas nia okos.

Nia dehan, Ministériu Petróleu ho Timor Gap maka ajuda ba haree iha prosesu kompensasaun nian, ne’eduni sira ne’e la’o hela. Kona-ba supply base, tuir nia, sei kontinua nafatin hela iha tribunal kona-ba kontestu ne’ebé Governu halo maibé projetu la’o nafatin iha ne’ebá.

Nia mós esplika katak, supply base ne’e hanesan bisnis boot extra ida ne’ebé Timor-Leste bele halo hanesan Bayu Undang ne’ebé la’o daudaun. Maibé supply base iha Darwin ne’e, nia afirma katak haree ba pasadu no planeia ba futuru maka bainhira mina fatin Greater Sunrise la’o sei uza supply base iha Suai.

Alfredo hatete, sistema planeamentu tenki book antes liu tanba ema atu fiar ita nia supply base sira tenki haree la’o no rekursu umanu mós iha kapasidade ona, hodi ema bele kuda sira nia osan iha ne’ebá.

Kona-ba orsamentu, Ministru ne’e haktuir katak, ba tinan ne’e (2016) orsamentu ba supply base hamutuk $35 milloes, maibé tanba iha dezafius iha tribunal hodi labele implementa maka osan refere iha fundu infraestruturas ninian.

Relasiona ho prekupasoens balun hosi públiku ba projeitu refere, nia dehan katak, iha nasaun demokrátiku ida tenki rona opinioens no análizas ne’ebé oi-oin de’it, liu-liu sosiedade sivil sira, maibé se la halo supply base refere maka Darwin maka hetan fali. Entretantu, supply base hanesan portu ida ne’ebé alén de uza ba supply base mineral nian, uza ba zona industriais no seluk tan.

Entretantu, Deputadu Eládio Faculto hateten nia parte preokupa tebes ho projetu tasi mane ne’ebé la la’o. Nia dehan saída maka empata projetu tasi mane paradu hela, parlamentu sei bolu parte kompetente hosi Governu atu presta deklarasaun iha parlamentu.

Suai Supply Base ne’e, nia aumenta, hanesan baze ou sentru lojístiku ida ba projetu lubuk iha tasi mane. Tanba ne’e, tuir Faculto, rojetu ne’e rasik sei fó reseitas boot ba estadu maibé sé ita la sériu maka ita sei hetan problema boot.

Nia hatutan projeitu tasi mane ne’e hahú uluk maibé to’o ohin loron ita la hare nia rezultadu maibé ohin loron ema krítika maka’as fali projeitu ZEESM ne’ebé avansadu tebes no sei fó benefísiu boot ba povu no estadu ida ne’e.

Ba asuntu ida ne’e, Dosente Fakuldade Siensia Polítika iha Universidade Nasional Timor Lorosa’e (UNTL), Camilio Ximenes Almeida hatete ba auto estrada ne’ebé planu atu hari’i diresaun Suai ba Betanu, no Viqueque ne’e, iha rai seluk ko’alia kona-ba auto estrada refere presiza haree ba postura rai nian.

Nia hatutan, Timor-Leste rai ki’ik no maioria populasaun moris iha vida agrikultura, sé ita halo autor estrada ne’e bele, maibé sosiedade balun bele infrenta ba impaktu hosi dezenvolvimentu ne’e rasik.

Parte seluk, tuir nia, ita nia sosiedade seidauk iha konxiénsia kona-ba auto estrada ne’e tanba populasaun balun husik de’it animal la’o ba mai ho livre. Tan ne’e, Governu halo projetu ne’ebé gasta osan boot, presiza halo kontrolu ne’ebé sufisiente, atu nune’e bele garantia nia kualidade, liu-liu instituisaun sira hanesan AND no seluk tan. (Jon)

Matadalan