Ajénsia ofisial xineza Xinhua lansa ona portal iha lian portugés

Ajénsia notísia ofisial xineza Xinhua lansa ona portal ida iha lian portugés, iha loron-sesta ne'e, hodi "promove relasaun sira entre Xina ho nasaun sira lian portugés" no "aumenta komprensaun kona-ba dezenvolvimentu ekonómiku-sosial Xina nian". 

Portal foun aprezenta tiha ona hanesan "medida importante hodi implementa diretriz hosi Prezidente [xinés], Xi Jinping, hodi aumenta fatin atuasaun ba média".

"Site" hakarak divulga "notísia sira ekonomia nian, polítika, sosiedade, kultura, desportu no teknolojia", liuhosi formatu testu, imajen no vídeo.

Hahú 2004 Xinhua konta ho departamentu ida iha portugés, ne'ebé agora daudaun fó serbisu ba ema na'in 14, entre sira maka ema brazileiru na'in tolu, maibé nia konteúdu maka, to'o agora, fahe liuhosi órgaun sira seluk komunikasaun nian.

Portal ho lian portugés hosi Xinhua hamutuk ona ho sira seluk ne'ebé maka ajénsia iha ona hanesan ho lian inglés, lian fransés, lian rusu, lian árabe, lian españól, lian japunés, lian koreanu no lian alemaun.

Lansamentu hosi portal ho lian portugés hala'o hamutuk ho aranke hosi Jogu Olímpiku sira iha Rio de Janeiro, kompetisaun ne'ebé, iha edisaun ikus sira, Xina konkore ba domíniu ho Estadus Unidus Amérika.

Aleinde Xinhua, iha mós versaun dijital hosi Diário do Povo, órgaun sentral hosi Partidu Komunista Xines, no Rádio Internasional Xina nian (CRI, ho sigla iha lian inglés), iha serbisu ida iha lian portugés.

Departamentu iha lian portugés hosi Diário do Povo hahú ona iha tinan liubá, hakotu ho "monopóliu" hosi CRI, serbisu notísia antigu liu iha lian portugés hosi Repúblika Popular Xina nian, ho tinan 56.

Iha tempu ne'ebá, polítika esterna xineza akompaña hosi defeza ba internasionalizmu proletáriu no Pekin "uluk apoia nasaun afrikanu sira iha luta hasoru imperializmu", liuliu Angola ho Mosambike.

Ohin loron, aumenta nafatin relasaun ekonómiku no komersial sira ho nasaun sira lian portugés nian, liuliu ho Brazil, Angola no Portugal, ne'ebé hametin dezenvolvimentu maka'as hosi ensinu portugés nian iha Xina.

Iha inísiu sékulu XXI, iha kontinente xinés tomak iha de'it universidade rua ho lisensiatura sira iha lian portugés. Ohin loron iha hamutuk 21.

Iha fatin seluk, iha 2003, Xina estabelese ona Rejiaun Administrativu Espesial Makau hanesan nia plataforma hodi hametin koperasaun ekonómiku no komersial ho nasaun sira lian portugés nian, nune'e iha tempu ne'ebá harii ona Fórum ba Koperasaun Ekonómiku no Komersial entre Xina no Nasaun sira Lian Portugés nian, ne'ebé koñesidu ho naran Fórum Makau.

Fórum Makau hala'o konferénsia ministerial sira iha tinan tolu dala ida no fórum foun tuirmai sei hala'o iha Makau iha fulan-Outubru.

SAPO TL ho Lusa