PRIMEIRA DAMA LA KONKORDA TMR ATU INVOLVE PLP

DILI - Primeira Dama Isabel Ferreira  alerta, hanesan fen-kaben nia la konkorda Prezidente Repúblika, Taur Matan Ruak (TMR) atu involve iha partidu polítiku inklui Partidu Libertasaun Povu (PLP) ne’ebé públiku hatene.

Primeira Dama hatete, atu dezenvolve nasaun ne’e sidadaun hotu bele halo ho nia kapasidade no badinas rasik, la presiza tama iha partidu polítiku.

Maske nune’e, Primeira Dama subliña,  bainhira Prezidente Repúblika hakarak duni atu involve iha partidu polítiku ne’e  direitu ema ida-idak nian.

“Hanesan  sidadaun no fen kaben, ha’u sempre fó konsellu  ne’ebé di’ak,  ida ne’e ha’u halo ba lider seluk no povu rai ida ne’e. Mais desizaun tomak iha Prezidente Taur Matan Ruak nia liman,” Primeira Dama subliña ba jornalista sira hafoin deklara riku soin Prezidente Repúblika nian iha Tribunál Rekursu, Tersa (06/09).

“Ba ha’u iha prinsípiu  ida, buat ne’ebé ha’u hakarak, ha’u hakarak ema seluk mós tenke halo tuir, saida maka ha’u eduka ha’u nia oan nune’e, ha’u hakarak família  seluk nia oan sira mós nune’e. Nune’e moris iha sosidade nia laran ho prinsípiu ho valores hanesan,” Primeira Dama hatutan.

Nia rasik seidauk bele dehan Partidu Libertasaun Popular (PLP) la’ós Taur Matan Ruak nian.

Tuir Primeira Dama, Taur Matan Ruak bele iha espíritu hodi dudu PLP hanesan mós Xanana Gusmão halo ba Partidu Demokrátiku (PD) iha tempu liu ba. (max)

Timor Post