Iha Outubru maka Horta sei desidi atu konkore ka la'e ba prezidensiál timoroan sira 2017 nian

Eis-prezidente timoroan, José Ramos-Horta, afirma ona ba Lusa, iha loron-kuarta ne'e, katak iha fulan-Outubru de'it maka desidi atu sai kandidatu prezidensiál ka la'e iha eleisaun sira fulan-Abril 2017, tanba apelu oioin kona-ba asuntu ne'e iha Timor-Leste.

ha semana hirak ikus ne'e imprensa timoroan no rede sosial sira refere daudaun posibilidade hosi rekandidatura ida Ramos-Horta nian ba prezidénsia iha 2017, buat ne'ebé maka líder timoroan ne'e seidauk hato'o ba públiku.

"Ha'u seidauk foti desizaun loloos ida kona-ba atu kandidatu fali ka la'e. Iha semana barak nia laran maka rona timoroan sira preokupadu ho eleisaun sira 2017 nian, iha prezidensial sira fulan-Marsu nian no mós ba lejislativu sira iha fulan-Jullu 2017", nia hatete iha loron-kuarta ne'e bainhira hatán ba Lusa kona-ba notísia sira ne'e.

"Ha'u rona ema barak hosi lista ida ne'ebé boot ne'ebé insisti, apela, atu ha'u bele kandidatu fali. Tanba sira senti preokupadu no, ha'u mós, iha tinan lima tuirmai, to'o tinan 2022", nia konsidera.

José Ramos-Horta ko'alia ba Lusa antes sai hosi Timor-Leste iha deslokasaun ba Eropa no Estadus Unidus no sei fila ba Díli iha fulan-Outubru, fulan ne'ebé selebra tinan 25 ba atribuisaun ba nia no ba bispu D. Ximenes Belo hodi hetan Prémiu Nobel Dame nian.

"Ha'u hanesan 50-50. Ha'u fila iha loron 04 Outubru no ha'u sei fó sai ha'u nia desizaun iha tempu ne'ebá", nia afirma.

Líder istóriku timoroan hatete katak preokupasaun sira kona-ba tinan hirak tuirmai prende ho nesesidade atu iha prezidente ida "hanesan autoridade ida, kapasidade mediasaun nian, diálogu nian, hodi halo ponte, entre forsa polítika sira".

"Ha'u laiha ligasaun ho partidu ida, ha'u iha ha'u nia opiniaun sira kona-ba personalidade oioin, maibé ha'u sei laiha ligasaun ba forsa ruma", nia esplika.

Preokupasaun espesial maka iha ligasaun ba "xoke hodi figura nasional rezisténsia tolu", liuliu CNRT (lidera hosi Xanana Gusmão), Fretilin (lidera hosi Francisco Guterres Lu-Olo ho Mari Alkatiri) no partidu foun PLP ne'ebé, maski seidauk iha anúnsiu ofisial to'o agora, bele lidera hosi atuál prezidente Taur Matan Ruak.

Nia refere katak preokupasaun iha mós ba situasaun ekonómiku no presaun kona-ba presu petróleu ne'ebé tuun no inserteza kona-ba saida maka akontese bainhira úniku posu atuál ne'ebé hatama osan ba Fundu Petrolíferu, Bayu Undan, hotu.

Dúvida kona-ba futuru hosi posu Greater Sunrise no demora to'o projetu ne'e bele avansa husik presaun sériu sira kona-ba orsamentu públiku nasional.

"Buat sira ne'e hotu hamosu preokupasaun barak entre kuadrante oioin. No iha senáriu hosi susar sira ne'e maka hakarak haree kandidatu ida ne'ebé laiha ligasaun ba forsa polítiku ida", nia hatete.

Ramos-Horta admiti katak lahó apoiu hosi forsa polítiku ida, iha rejimi semiprezidensialista timoroan, hanesan susar atu xefe Estadu bele halo avansa nia preokupasaun sira, maibé nia destaka katak importante atu futuru Prezidente hanesan ema ida ne'ebé modere no mantén serenidade entre forsa polítiku oioin iha nasaun.

"Xoke sei hanesan polítiku. Ita ko'alia kona-ba ema sira ne'ebé iha responsabilidade maka'as no sira hatene manda sira nia adeptu sira, kuadru médiu sira no disiplina iha linguajen", nia hatete.

"Hanesan forsa boot tolu ne'ebé sei hasoru no tenki presiza esforsu hosi ema tomak, inklui hosi ha'u, hosi ema sira seluk, hosi igreja, hodi tulun hakalma ánimu sira. Prezidente hafoin ne'e tenki hetan solusaun governativu ida ne'ebé hametin nasaun", nia hatete.

Bainhira avansa, sei hanesan kandidatura konsekutivu datoluk hosi Ramos-Horta ba kargu prezidente nian, hafoin vitória iha 2007 - iha volta daruak - no lakon, iha kedas volta dahuluk iha 2012.

José Ramos-Horta kaer kargu prezidente entre 20 Maiu 2012 to'o 20 Maiu 2007, hetan impedimentu - hafoin hetan tiru - hodi kaer knaar sira entre 11 Fevereiru to'o 17 Abril 2008.

Iha eleisaun sira ne'e, José Ramos-Horta sai ona hanesan kandidatu daruak ne'ebé hetan liu votu iha volta dahuluk (votu 21,81%), lakon ba Francisco Guterres Lu-Olo (27,89%), maibé konsege hetan apoiu iha volta daruak hasoru líder Fretilin nian no hetan votu 69,13%.

Iha 2012, Ramos-Horta sai hanesan kandidatu datoluk ne'ebé hetan liu votu iha volta dahuluk, ho 17,3%, lakon ho Francisco Guterres (28.76%) ho Taur Matan Ruak (25.71%), no kandidatu ikus manán iha volta daruak.

Antesipa ona katak Francisco Guterres sai fali hanesan kandidatu iha 2017 ho observadór sira no analista sira konsidera katak hanesan favoritu, no atuál xefe Estadu, Taur Matan Ruak, konfirma ona ba Lusa iha tinan liubá katak sei la kandidatu fali nia aan.

SAPO TL ho Lusa