Kandidatu Xefe Suku Barak Avansa ba Segunda Volta

DILI - Eleisaun ba lideransa suku ne’ebé hala’o dala ida (serentak) iha loron Sábadu, 29/10, ne’e iha kandidatu barak mak avansa ba eleisaun daruak (segudo volta), tanba rejultadu votus la atinji 50% + 1. 

Eleisaun dahuluk ba kandidatu xefe suku sira uza sistema atribuisaun mandatu maioria absoluta (50% totál votu válidu + votu 1). Entretantu eleisaun ba daruak uza atribuisaun mandatu maioria simples (kandidatu/a ne’ebé hetan totál votu válidu barak liu mak manan iha eleisaun ne’e)

Tuir mai iha suku balun ne’ebé Jornalista Timor Post konsege halo kobertura no hetan rejultadu votasaun mak hanesan tuir mai.

Lahane Oriental

Iha suku Lahane Oriental, Munisípiu Dili, iha pakote 10 mak kompete iha eleisaun ba lideransa Suku, iha kandidatura na’in  rua hanesan Saturnino Soares no Sebastião A. Pinto mak kontinua avansa ba segunda ronde tanba kontagen votus provizoriu nian na’in  rua nian hanesan.

Tuir Prezidente meza aldeia Becoe, Suku Lahane Oriental José  da Cruz hatete, kontagen provizoriu ba kandidatura na’in  10, iha na’in  8 mak vorus la barak hodi lakon no iha kandidatura na’in  rua mak sira númeru votantes kuaze hanesan.

“Ami halo kontagen hodi kalan, haré katak, kandidatura na’in  rua hanesan Saturnino Soare Bareto ho Sebastião A. Pinto sira na’in  rua nia votus kuaze porsentu 80%, tanba ne’e sira na’in rua sei kompete hadau malu iha segunda ronde hodi lidera suku Lahane Oriental,” hatete Prezidente Meza José  ba Timor Post iha Suku, Lahane Oriental, Domingu, (30/10)

Tuir prezidente meza, bainhira  kandidatura na’in  rua ne’e avansa ba segunda ronde, ne’e tenke hein to’o loron 15.

Enkuantu hosi loron 15 ne’e, kompetensia tomak iha ESTAE mak sei haré  fali hodi organiza ba faze segunda ronde nian.

Entretantu tuir lista kontagen provizoriu ne’ebé mak Timor Post asesu iha fatin kontagen entre aldeia 8 iha suku Lahane Oriental identifika katak, númeru  votantes iha de’it kandidatura na’in  rua nian mak bo’ot liu sira na’in  8 seluk.

Aldeia 8 ne’ebé diariu ne’e asesu iha sentru vitasaun 2 hanesan Sentru Votasaun Mota Ulun no Sentru Votasaun SD 5 Auturi Laran no aldeia 4 monta iha sentru votasaun Mota Ulun mak hanesan aldeia Sare, Becoe Rai Mean no Suhu Rama aldeia 4 monta iha Sentru Votasaun SD 5 Aituri Laran mak hanesan aldeia Tubarai, Metin, Temporal no Postu Final. (gus)

Timor Post