Partidu
sira tenke iha kompromisu nebe’e forte ba respeita direitus ema nian no
anti-politika divizionista--Iha diskursu no pratika
La
to’o tinan ida ona maka ita sei hasoru eleisaun importante rua--Eleisaun ba
Presidente iha fulan Marsu 2017 no ba Parlamentu iha fulan Julhu tinan hanesan.
Nune’e maka ema barak, inklui ha’u rasik, komesa servisu makas ona ba
aktividade partidu politiku nian. Ami la’o ho partidu foun, maluk sira barak
seluk maka la’o ho partidu sira nebe’e harii nanis ona.
Liu husi meius ida ne’e hau hakarak fo hanoin ba hau aan rasik, nomos ba maluk sira seluk, kona ba pontus hirak nebe’e hau fiar sai nudar ita hotu nia dever. Iha tempu eleisaun ne’e partidu sira sei halo knar hotu atu hetan votus nune’e bele implementa sira nian politika. Maibe’e, hau fiar katak partidu sira iha dever atu tane as nafatin valores prinsipais sira ba respeita direitu ema nian, no iha dever atu kontra lia fuan hirak nebe’e sei harahun solidariedade ba komunidade nasional. Partidu la bele tolera hahalok no diskursu sira nebe’e rasista, regionalista, xenofobia, homofobia no hahalok sira seluk nebe’e promove diskriminasaun no odiu e vingansa.
Hanesan
primeiru Prezidente Mocambique nian, Samora Machel, dehan “ema ida nebe’e
rasista ne’e uluk nanain oportunista”. Oportunista duni tanba la iha argumentu
nebe’e naton atu konvense sidadaun sira atu tuir nia politika. Tanba ne’e maka
partidu sira iha dever atu esforsu makas hodi hapara manobra politika
oportunista sira. Ita hotu tenke hanoin nafatin katak ita hotu involve iha
politika atu lori moris diak ba Timor hotu, no atu harii Timor ida iha nebe’e
Timor oan -hotu, la iha diskriminasaun, atu bele moris ho dignu.
Nune’e
hau hanoin maluk sira hotu, talvez mea culpa mos, nebe’e hanaran
aan “intelektuais” iha partidu sira laran mos iha dever atu kaer nafatin sira
nian papel nudar intelektual. Hanesan matenek nain Noam Chomsky dehan, dever
chave husi intelektual mak atu koalia lia los ba poder. Sira tenke konsiente
katak la bele tolera hahalok sira nebe’e lohi no bobar para hetan deit poder.
Sira tenke hanoin nafatin katak sira nian papel prinsipal iha partidu sira mak
atu hatudu lialos. Laos atu manipula publiku hodi hetan poder. Hetan votu husi
populasaun nian objetivu la’os poder em si, maibe’e nudar sinal da konfiansa
ida hodi serbi sidadaun sira sem diskriminasaun.
Sem comentários:
Enviar um comentário