PROFESSIONAL SAUDE TENKI SERVISU HO JUSTU

Ministeriu saude (MS) husu professional saude hotu servisu ho justu no professional hodi fo atendementu dignu ba pasiente sira no labele abandona pasiente iha oras servisu.

Diretora Jeral do Prestasaun Servisu husi Ministeriu Saude, Odete da Costa Viegas hato’o lia hirak ne’e relasiona ho professional saude hanesan mediku balun ne’ebé hala’o servisu iha Hospitral Nasional Guido Valadares (HNGV), maibe sei servisu tan iha klinika privadu sira.

“Ami deskuti hela, tanba tuir lei funsaun publiku ne’e labele. Maibe ita hare mediku balun, tuir lolos sira tenki servisu iha oras walu nia laran, maibe husik hela sira nia servisu ba fali servisu fatin seluk, ne’e lajustu. Laos deit mediku sira, enfermeiru no parteira mos nune’e,” dehan Odete da Costa Viegas ba jornalista sira iha Hotel Novo Turismu Lesidere foin lalais ne’e.

Nia esplika, ba profesional saude, kuandu liu ona oras tuku 5:00 ba leten, lei la bandu sira atu halo servisu seluk, maibe kuandu iha hela oras servisu, proebidu halo fali servisu seluk.

Nia hatutan, Ministeriu Saude mos iha ona inspektor jeral de saude atu hare ba kestaun ne’e, kuandu akontese duni kazu sira hanesan ne’e atu  halo investigasaun.

“Laos ne’e deit, ami mos sei hare funsionariu sira pratika mal jestaun, funsionarius ne’ebé tama latuir oras, se hetan duni akontese hanesan ne’e sei hetan sansaun,”afirma Odete.Car

Jornal Nacional