Aumenta ba ema na'in 97 ne'ebé mate iha rai-nakdoko iha Indonézia

Númeru hosi ema sira ne'ebé mate iha rai-nakdoko iha provínsia indonéziu Aceh, iha estremu norte Sumatra nian, aumenta ba na'in 97, hatete hosi responsável hosi ezérsitu iha rejiaun oeste indonéziu ne'e, iha loron-kuarta, iha komunikadu foun ida.

"Mate ona ema na'in 97 maibé númeru sei kontinua aumenta", deklara hosi Tantang Sulaiman.

Balansu ikus ida hatete katak ema na'in 54 mate iha rai-nakdoko.

Rai-nakdoko ne'e akontese iha tuku 05:03 (oras lokal), ho episentru kilómetru 10 ba norte iha lokalidade Reuleuet, hatete hosi Serbisu Jeolójiku Estadus Unidus nian (USGS, sigla iha lian inglés).

La fó sai alerta 'tsunami'.

Rai-nakdoko hamosu pániku no estraga balun iha illa indonéziu Sumatra

Rai-nakdoko ho magnitude 6,4 iha eskala Richter ne'ebé doko kalan ne'e iha provínsia Aceh, iha norte illa Sumatra nian iha Indonézia, hamosu pániku no estraga balun.

Rai-nakdoko akontese iha 22:03 GMT, ho nia hiposentru lokaliza iha klean ho kilómetru 17,2 no episentru kilómetru 10 hosi norte lokalidade Reuleuet, tuir Serbisu Jeolójiku Estadus Unidus nian ne'ebé la fó sai alerta tsunami nian.

Nakdoko ne'e senti iha rejiaun Aceh tomak, ne'ebé iha tinan 2014 hasoru tsunami ida iha Oseanu Índiku, afirma hosi Eridawati, responsável lokal hosi Ajénsia Meteorolojia, Klimatolojia no Jeofízika ne'ebé, hanesan ema indonéziu sira seluk, iha de'it naran ida, hodi hatutan katak senti pelumenus réplika lima.

Iha sidade Sigli, ema sira senti pániku no halai ba sira nia uma hodi buka subar hosi tasi.

"Ami agora ba daudaun ba Tijue [iha kilómetru tolu hosi Sigli] tanba ami tauk tsunami ida", nia konta ba AP Nilawati, ne'ebé nia uma besik iha oseanu.

Iha relatu sira katak eletrisidade hamate tiha iha distritu Pidie no universidade iha Bireuen hetan estraga balun, maibé laiha tán detalle sira seluk kona-ba estraga sira.

Iha fulan-Juñu, rai-nakdoko ida ho magnitude 6,5 senti iha zona oeste Sumatra nian, hodi estraga prédiu balun no halo ema na'in ualu kanek.

Iha Indonézia baibain iha rai-nakdoko no atividade vulkániku, tanba nia pozisaun iha "Kadeli Ahi nian" iha Pasífiku, ne'ebé plaka tektóniku sira hasoru malu.

Illa Sumatra hanesan sensível tebes ba rai-nakdoko sira no provínsia Aceh, iha ponta illa nian, hetan ona tsunami ida ne'ebé mosu hosi rai-nakdoko ida iha tinan 2004, ne'ebé halo ema na'in 170.000 resin mate iha Indonézia no millaun resin mate iha nasaun sira Índiku nian.

SAPO TL ho Lusa – Foto: Ekipa tulun nian uza eskavadeiru ida hodi buka vítima sira iha distritu Pidie Jaya, Aceh, iha Indonézia, iha loron 07 Dezembru 2016. Foto@ Hotli Simanjuntak