Baku Membru PNTL, Nico Hatan Tribunal

DILI - Tribunal Distrital Dili halao julgamentu ba arguidu Nicolao Lobato, tanba deskonfia halo krime obsevasaun patrimonia estadu hasoru PNTL Alsino Lay.

Liu husi audensia julgamentu tribunal lee sai akuzasaun husi Ministeriu Publiku katak, iha loron (5/11/2013) tuku 6:00 kalan iha Liquica arguidu ba lezadu nia uma hodi husu osan $50 no hasae ba $100. Maibe arguidu lakohi fo, neemak lezada ameasa dehan “hau nia maluk task forse sira hein hela”. Rona ida neemak arguidu haksesuk malu too duir monu lezada ba rai.

Hatan ba akuzasaun nee arguidu Nicolao deklara, akuzasaun nee los hotu. Lezadu ba husu osan no ameasa fali dehan lakohi sei lori nia maluk polisia sira mai atu baku arguidu ho nia kolega. Neemak sira haksesuk malu too lezadu monu ba rai.

Iha fatin hanesan lezadu Alsino hatete, momentu nee nia hetan autorizasaun husi komandu hodi halo operasaun ba GAM iha fatin nee. Nia hanesan PNTL nomos intelijen hodi halo operasaun ba iha fatin nee tanba hetan informasaun katak iha fatin nee GAM sira halao sira nia aktividade iha tempu kalan. Too iha neeba nia hetan nia kolega naran Sico ba kios sosa tua hodi ba hemu ho nia kolega sira. Haree ida nee lezadu hakbesik ba fatin neebe arguidu sira tur. Bainhira lezadu atu hakbesik an ba sira, arguidu ho nia kolega hamrik hodi haksesuk malu too riba malu ba rai.

Rona tiha deklarasaun husi parte rua nian, tribunal submete kedas ba iha alegasaun final. Nunee Ministeriu Publiku husu ba tribunal atu aplika pena prizaun tinan 3 no suspende tinan 5. Tanba provadu katak arguidu halo asaun hasoru lezadu neebe hanesan PNTL bainhira halao hela fungsaun estadu nian. Entretantu parte defesa husu ba tribunal atu aplika pena neebe kman. Informasaun kompletu iha STL Jornal no STL Web, edisaun Sabado (3/12/2016). Domingas Gomes

Suara Timor Lorosae