CNE Hahú Resensiamentu Iha Australia No Portugal

DILI, (ANTIL) – Komisaun Nasionál Eleisaun (CNE) hahú resensiamentu eleitorál komesa loron 3 to’o 30 Dezembru 2016 iha Australia no Portugal.

Ba jornalista sira iha nia servisu fatin CNE, Dili, Kinta (2/12). Prezidente CNE, Alcino Barris esplika,  Governu identifika ona fatin resensiamentu iha nasaun Australia mak  Darwin no Sidney. Entretantu iha Portugal, identifika ona Lisboa no Portu.

Atu hetan susesu iha resensiamentu, Alcino hatutan, presiza forma timoroan, funsionariu hosi ministériu negosiu estranjeiru iha nasaun rua ne’e, hodi reprezenta CNE no Sekretariadu Tékniku Administrasaun Eleitorál (STAE), bazeia ba lei númeru 6/2016”.

“Desde 1 Dezembru 2016, haruka tiha ona formadór sira bá Portugal no Australia hodi supervizaun resensiamentu iha rai liur,” nia dehan.

Atu tuir resensiamentu iha Asutralia no Portugal, timoroan sira tenki iha pasaporte, sédula, sertidaun husi Inan – aman, sertidaun moris no sira seluk, atu justifika ema ne’e merese atu partisipa iha eleisaun prezidensiál no eleisaun parlamentár tinan 2017.

Tuir lei, sidadaun timoroan sira iha estranjeiru liu husi ema na’in 50, bele loke postu resensiamentu.

Kona-ba orsmentu, Prezidente CNE esplika, CNE la preve orsamentu espesiál ba resensiamentu. Maibé halo de’it proposta ba Konsellu Ministru, liu hosi kompeténsia Primeiru Ministru mak bele aloka orsamentu. (Jornalista :Zezito Silva/Editór: Otelio Ote)