Dalan Manorin Nian Mak Labele Abandona Estudante

ATAÚRU (ANTIL)-Dalan manorin nian mak labele abandona estudante sira ho limitasaun profesór ne’ebé iha. Nune’e, tenke kumpri oras atu labele difikulta labarik sira, Xefe Gabinete Eskola Sekundária 99 Ataúru, Anis Saramento informa ba ANTIL, Kuarta, (30/11/2016) iha Beloi Vila.

Eskola Sekundária Jerál 99 Ataúru ho totál estudante 555, hetan difikuldade ba profesór língua ingleza no tetun tanba iha profesór permanente na’in-ida de’it.

Atu rezolve kestaun ne’e, Eskola Sekundária Jerál husu ajuda ba iha profesór ensinu sekundáriu tékniku vokasionál na’in-rua, hodi reforsa prosesu aprendizajen eskola ne’e. Nune’e, totál profesór língua ingleza hamutuk na’in-tolu hodi hanorin estudante sira ba períodu ida ne’e.

“Profesór iha língua portugeza iha na’in-rua no mestre husi tékniku vokasionál bele halo kmaan  ona ami-nia difikuldade”, Anis relata.

Nia afirma, eskola halo ona pedidu proposta adisionál profesór nian ba Ministériu Edukasaun, maibé to’o agora governu seidauk koloka ba eskola refere. “Posibilidade seluk mak maluk sira ne’ebé mai volutáriu iha ne’e hakarak aprende entaun sira mai hanorin fulan neen no ualu para ona”.

Xefe Gabinete ne’e fiar katak, Ministériu Edukasaun sei koloka profesór hodi hanorin iha eskola sekundária jerál. Karik tarde sei husu nafatin ajuda profesór tékniku vokasionál, ajuda nafatin hodi hein desizaun husi ministériu.

Ho difikuldade, daudaun ne’e eskola sekundáriu jeral iha profesór hamutuk 24 no husu ajuda husi ensinu rekorrente ho profesór ida ne’ebé nia estatu seidauk loos no hetan mós ajudu voluntáriu husi estudante Universidade Nasionál Timor Lorosa’e (UNTL). (Jornalista: Maria Auxiliadora/Editor: Otelio Ote)

Foto: Estudante Eskola Sekundária Jerál 99 Ataúru rona avizu husi sira-nia profesór. Foto ANTIL, 30/11/2016