Marsu, Sei Realiza Kongresu Edukasaun

DÍLI, (ANTIL) - Tinan létivu 2017 ne’e, iha Marsu, sei iha kongresu edukasaun nian no presiza husik hela marka.

“Importante tebes atividade kongresu edukasaun ida ne’e. La’ós tanba ita hanoin hela atu altera, maibé momentu ida ne’ebé ita kontinua refleta, oinsa mak dezenvolve edukasaun iha Timor-Leste,” hateten Ministru Edukasaun, António da Conceição iha nia intervensaun iha Centro Convenções de Díli (CCD), Sesta (20/01) bainhira halo reflesaun hamutuk ho responsável no funsionáriu ministériu edukasaun nian.

Ministru edukasaun ne’e hatutan katak Edukasaun la’os estadiu, edukasaun tenke sentralizada. “Tanba ida ne’e mak kongresu, iha espíritu ida ne’e hodi ita bele atualiza medida sira ne’ebé mak ita-bele toma atu depois ita bele kontinua hasa’e,” tenik tan ministru ne’e.

Ministru ne’e mós akresenta tan katak atividade importante seluk ne’ebé mak ita bele husik iha ne’e mak reforsu ba dezenvolvimentu instituisaun nian, kapasidade profesór no diretór sira iha influénsia barak ba hadi’a kualidade edukasaun. “Diretór sira embora iha responsabilidade ne’ebé deskonsentrada, maibé ha’u husu atu kontinua iha responsabilidade ida ne’e no la komportalizar edukasaun,” nia husu.

Nia hatutan mós katak edukasaun ne’e asuntu nasionál, la’ós de’it ba Baucau, ba Liquiça ka seluk nian mesak. “Tanba ida ne’e, ita refleta espíritu hodi aprende tan,” katak ministru ne’e.

Reflesaun ne’e la’os atu ita fó sala malu maibé konsolida malu no ita-nia ekipa ba melhor serbisu.“Edukasaun la’ós de’it responsabilidade Ministériu Edukasaun nian maibé mós ita-hotu nian,” nia salienta.

Tanba ne’e, tuir governante ne’e katak krítika sira ne’ebé Parlamentu Nasionál halo la’ós atu hadook-kapasidade ministériu nian maibé reflesaun ne’ebé fó ba ministériu hodi nune’e bele hadi’a di’ak liutan nia serbisu.

“Tanba ne’e, ita tenke projeta ba buat ne’ebé pozitivu ba buat ne’ebé ita rona,” konklui ministru António da Conceição hodi afirma dala ida tan ba responsável edukasaun tomak ho nia estrutura sira iha reflesaun ne’ebé hala’o tema: “Refletir o Passado Para Melhor Servir o Povo e a Nação”. (Jornalista:Rafy Belo/Editor : Alberto Alves)

Foto: Ministru Edukasaun, Ministru António da Conceição