Saída hosi UE tenki hato'o ba parlamentu - Supremu Tribunal

Supremu Tribunal Reinu Unidu nian desidi ona katak Governu britániku tenki hetan aprovasaun hosi Parlamentu antes hahú prosedimentu sira hodi sai hosi Uniaun Europeia, ne'ebé sei sai hanesan lakon polítiku ida ba Therese May.

"Ohin, ho votu maioria ualu kontra votu tolu, Supremu Tribunal determina katak Governu labele hala'o artigu 50 lahó desizaun parlamentar ida ne'ebé autoriza hodi halo", afirma hosi prezidente tribunal, David Neuberger.

Supremu Tribunal desidi mós katak Governu lalika konsulta Eskósia, Wales ka Irlanda-Norte antes hahú prosesu saída nian.

Maski deliberasaun daruak sei di'ak ba primeira-ministra Theresa May nia Governu, desizaun ne'e sei, pelumenus, atraza prosesu saída Reinu Unidu nian hosi Uniaun Europeia, hafoin governante hatudu tiha intensaun hodi hahú prosedimentu sira iha fulan-Marsu.

Prokurador-Jeral britániku, Jeremy Wright, konsidera ona katak desizaun hanesan deziluzaun ida, maibé hatete katak Governu sei kumpri desizaun hosi Supremu Tribunal no sei hala'o iha loron-tersa ne'e deklarasaun ida iha Parlamentu.

Desizaun loron-tersa nian fó esperansa ba grupu polítiku pró-europeia iha Parlamentu britániku hodi bele halo neineik prosesu hodi hasai Reinu Unidu hosi Uniaun Europeia.

Defensór sira ne'ebé defende saída hatudu sira nia diskordánsia kona-ba prorogativu hosi Parlamentu ne'ebé agora rekoñesidu hosi Supremu Tribunal, hodi konsidera katak karik lalika iha kbiit hodi rejeita vontade eleitor sira nian, ne'ebé vota ona hodi husik UE iha referendu ne'ebé hala'o ona iha loron 23 Juñu liubá.

Theresa May iha intensaun hodi invoka vantajen real - kbiit ida ne'ebé kaer hosi monarka iha sékulu barak nia laran, ne'ebé permiti ba nia desizaun sira kona-ba tratadu sira no asuntu sira seluk lahó votu hosi Parlamentu - hodi hahú hala'o artigu 50 hosi Tratadu Lisboa, ne'ebé permiti ba Estadu-membru ida hahú prosedimentu hodi sai hosi Uniaun Europeia.

SAPO TL ho Lusa