MAP sei gasta $600 mill resin sosa traktor boot 12

DILI - Ministeriu Agrikultura no Peskas (MAP) tuir planu iha tinan 2017 sei hola tan traktor boot 12 ho valor orsamentu liu $600 mill ne’ebé mak aprova ona iha Orsamentu Geral 2017.

“Osan ne’ebé mak ita sei tau hodi sosa tan traktor boot 12 besik $600.000,00,” dehan Ministru Agrikultura no Peskas (MAP) Estanislau Aleixo da Silva ba jornalista sira iha edisifisiu TrandInvest kinta (02/02).

Nia esplika katak husi planu sosa traktor oras ne’e daudaun MAP prepara hela ba prosesu aprovisionamentu hodi kompana sir abele hatama ona traktor antes elisaun. “Tan ne’e iha tinan ida ne’e nudar tinan elisaun ami hakarak hola tan traktores barak maibe orsamentu kua tan ne’e ami sei hola tan traktor 12 no agora ami komesa ona hahu komesa halo prosesu aprovisionamentu hodi bele trator tama lalais no wainhira governu foun tama ami sei husik liamenon hodi traktor sira tama maibe tenke harii sentru Manutensaun,” hateten nian.

Nia mos afirma MAP tau peoridade hodi hola traktor boot 12 ne’e tanba oras ne’e traktor barak mak at no lakonsege ona hodi bele asiste agrikultor sira halo servisu. Tan ne’e atu garantia nafatin traktor sira ho kondisaun diak oras ne’e MAP mos planu Harii centru Manutensaun nune’e bainhira traktor at presiza iha manutensaun hodi nune’e labele gasta osan barak.

“Problema boot ne’ebé ita iha katak traktor sira at tanba ita la harii centru Manutensaun no dala ruma ema manan tiha kontratu manutensaun mos halo ladun diak hodi implika traktor barak mak at, wainhira hola traktor no harii centru manutensaun karik problema ne’e sei la akontese , karik dala ruma balun at iha rajaun balun maibe atu at hanesan ne’e laiha,” katak nia.

Estanislau mos Informa katak ho problema ne’ebé maka traktor at barak oras ne’e dadaun Ministeriu halo hela kalendariu traktor nian hodi fo asistensia ba agrikultores sira. “Tan ne’e ami husu atu establese kalendariu ida ida hodi fila rai ninian tanba hotuhotu hakarak fila rai maibe traktor la to’o , entaun balun fila uluk no balun fila tuir tanba balun ne’ebé hotu ona ajuda fali ida ne’ebé sidauk fla ida ne’e mak entaun ida ne’e mak ami tenta hela kalendariu,” dehan nian. (BT)

Matadalan