MEDIA HO TIPU NUTISIAS DRAMATURGI PÚBLIKU HARE DEIT HUSI PALKU OIN

Radio Liberdade Online - Opiniaun ne'e ninia kontiudu tomak responsavel husi hakerek nain no instituisaun. Redasaun fo espasu menu ne'e hodi ejerse ema no instituisoens nia hanoin no ideias konaba asuntu ruma ba prosesu dezenvolvimentu Timor-Leste.

Renato “Apaa Sege” da Costa – Rádio Liberdade

Teoria Dramaturgi  fo sai husi Erving Goffman sociólogos nebe iha influensia ba vida moris sosiais nian husi  América iha sékulu  20. Teoria ne’e defini katak  teatru no drama  iha ninia signifikasaun nebe hanesan ho interasoens  sosiais  iha vida moris lor loron nian. Ideas dramaturgi   ne’e fo sai husi Erving Goffman iha 1959,  liuhusi ninia livru  “Presentation of Self in Everyday Life”,   Goffman fo ninia justifikasaun katak  identidade  kada ema ne’e la estável  ba buat nebe mak  fo sai ba públiku ho identidade ida nebe bain bain nia halao iha nia moris lor-loron. Goffman aprezenta katak  tipus  interasoens  no komportamentais hodi  mostra aktus ou hahalok refere ho maneiras hanesan autor filme hodi bele konkista telespetadoers sira nudar jestu atu hamosu  impresaun nebe diak hodi atingi objetivu nebe mak iha.   Maibe wainhira fila ba kotuk realidade hatudu katak  aktus ou kompartamentus hirak ne’e somente atu bele fasilita deit autor ninia hakarak hodi bele konkista ema seluk nia  hakarak nebe dezenhadu husi grupu sira nebe haksumik iha palku kotuk.

Tuir teoria ne’e katak ita ema umana nudar autor nebe tenta atu kombina karaterístikas personal ho nia propósitos ba ema seluk liu husi "espectákulus dramátikus". Hodi alkansa objetivus ne’e, tuir  konseitu dramatúrgi, kada umana  dezenvolve ninia komportamentus hodi bele  suporta ninia aktus sira ne’e.

Teoria Dramaturgi ne’e  kompostu husi palku oin ou palku leten (front stage) no palku kotuk (back stage) Palku oin nudar parte atu ezekuta ho nia funsaun atu define  situasaun nebe mostra aktus ou karateristika pesoal refere ba audensia sira. Iha front stage ne’e rasik fahe ba partes rua;1)oinsa atu  defini senário físiku nebe mak presiza wainhira pesoal refere  interpreta ninia aktu, no 2) personalidade iha públiku kona ba várius tipu husi equipamentus hodi bele apoiu sentimentu husi autor ne’e rasik. Aktus husi personalidade públiku ne’e rasik fahe tan ba partes rua mak hanesan  aparecimentu nebe komposta husi várius tipus  nebe produtu hodi introduz  estatutu social husi autor ne’e rasik. Ida tan fali mak jestu ou estilus ho nia signifikasaun  atu halo introdusaun ba tipuatu desempenha autor nia situasaun nebe determina tiha ona. Back Stage (palku kotuk)  nudar espasu ou fatin  hodi ezekuta senáriunebe prepara husi  ekipa susesu wainhira autor refere aprezenta an iha front stage.

Termos dramaturgia iha ligasaun metin ho teatru ou  personagem fiksu iha palku leten kona ba oinsa autor halao ninia funsaun ho karateristika ema seluk nian hodi nune’e públiku bele hetan informasaun  husi pesoal refere. Aktus no maneiras hirak nebe autor refere fo sai iha públiku nudar estratejia ida nebe ho ninia finalidade atu atrai públiku bele iha intereses ba mensajen hirak nebe autor refere fo sai.

Fatos nebe fo sai iha leten ne’e  inspira tebes ita atu bele halo analiza no reflesaun kona ba realidade ba potensia husi informasaun nebe fo sai husi media kona ba  realidade husi informasaun nebe mak públiku hetan kona ba asaun hodi hetan poder husi autor politik sira .Palavra palavra promesas iha palku oin nebe fo sai husi media liuhusi titlu nutisias nebe mak iha,  bele sai mos nudar alegasaun ou realidade realistiku kona ba figura politikus sira.  Situasaun no diskrisaun nebe media públika sai halo públiku nia analiza sai prematura demais kona ba figura refere maske  públiku lahatene nia ho diak, tamba deit  persepsaun no informasaun nebe media públika sai destroi tiha ona ita nia pensamentu kona ba figura ne’e rasik liuhusi aprezentasaun infromasaun nebe mesak diak deit.

Titlu nutisias hanesan’  XANANA NIA KARTA ABERTA, CNRT APOIU LU OLO,  ANGELA FREITAS  SEI LAKOHI SIMU SALARIU – PRESIDENTI TRIBUNAL LATAUK AMEASAS, PRIMIERA DAMA TRISTI “ no titlu sira seluk nebe fo sai ba públiku ho karateristiku provokativu uitoan,  hamosu duvidas ba ita refere ba teoria dramaturgi nia konseitu. Nusa mak nutisias hirak ne’e públika informasaun husi parte  front Stage deit???. Karik media aplika hela maneiras tuir teoria dramaturgi kona ba intereses balun husi grupu balun iha palku kotuk (back stage) hodi dezenha senariu ne’e???

Teoria Dramaturgia iha ligasaun metin ho kapasidade atu transforma,liu liu kapasidade hodi transforma ideas ideas briliante husi autor (media) sira  ho liafuan liafuan nebe hamosu ema nia esperansa no mos emosaun. Manifestasoens husi aktus hanesan ne’e mosu ho  várias formas, hanesan kapasidade atu  konvense públiku kona ba media ninia idéias. Liu liu wainhira media  refere fo sai informasaun ba públiku hodi koalia  kona ba informasaun refere no oin sa sira  konvense públiku wainhira iha informasaun nebe hetan iha terenu. Afirmasaun husi nutisias ho tipu hanesan ne’e sempre  hetan lukru nudar aktus komersiu  husi media iha ninia kuntiudu públikasaun. Maibe mosu perguntas ba ita hotu,media tuir teoria dramaturgi nebe hamrik iha palku leten liuhusi titlu titlu hirak ne’e, saida mak media ne’e hakarak kria iha sosiadade nia let ho  titlu titlu nebe hamosu paniku,emosaun no diskontenti husi tipu nutisias ne’e??. Iha situasaun pre-eleisaun hanesan ne’e, merese duni ka atu media deskredita integridade autor politik sira seluk hodi tane as autor ida fali??. Liga ba teoria dramaturgi, karik media hakarak iha palku oin (front stage) tengki hamosu informasaun atakas malun entre autor politik sira??. Maske iha back stage, sira hadomi malun hela hodi nune’e informasoens iha front stage nebe media publika bele hamosu rendimentu diak.

Se nune’e duni, media lahalo balansu entre titlu hirak ne’e ho buat nebe mak akontese iha pasadu  nudar referensia ba públiku hodi hamosu kunfiansa ba leitores hodi halo desizaun. Tamba wainhira autor ne’e tun husi palku  leten, senariu nebe nia koalia iha palku leten sei labele akontese tamba senariu nebe prepara husi ekipa iha palku kotuk bele kontraditoriu husi palavra promesas hirak ne’e.

Iha situasaun ho kualidade nutisias husi modelu nebe  media sira opta kona ba saida mak akontese iha deit iha palku leten  liuhusi titlu titlu nebe uniku, mudansas saida mak media hakarak??.

Buat nebe  ator fo sai iha palku leten  implika  motivu no signifikasaun balun husi interesses no desejos balun nebe  la hetan  kobertura masimu husi media .Tamba deit lahetan kobertura masimu, julgamentu husi públiku ba  informasaun nebe fo sai husi media kona ba pesoal refere sai negativu se nutisias ne’e at no sai pozitivu se nutisias ne’e diak.   Se nune’e  personagem nebe mak autor fo sai kombina ho nia  personalidade husi autor refere nebe públika husi media,  informasaun sufisienti saida mak públiku hetan? Oinsa media nebe kompostu husi ema umana hanesan ita sira seluk ne’e bele kria opiniaun ho modelu front stage deit?? Karik iha aktus ba informasaun ho modelu front stage ne’e, media eduka ona ninia leitores atu bele kumpriende no hatene ho diak kona ba autor refere husi parte back stage nian???.

Resposta ba perguntas hirak ne’e, hamosu reasaun pro no kontra entre tipu de publiksaun husi media sira. Media nebe konstantamente asumi mos funsaun nudar ajente de edukador hodi informa ba públiku ho informasaun nebe detailadu no kompletu kona ba figura ninia karateristika politika orijin (back stage) ladun hetan fatin. Media prefere liu oinsa atu soe ba públiku (front stage) informasaun nebe nakonu ho modelu modelu tipu dramaturgi nian. Ho titlu titlu nutisias nebe mak  atrai ema ( headline bombastiku – titlu hateten A, kuntiudu nutisias hateten B), edukasaun politika  saida mak públiku bele hetan husi media???

Karik, refere ba Goffman nia hanoin ho teoria dramaturgi  liga ba tipu de informasaun husi media sira iha situasaun politika ida hanesan ne’e hatudu momos katak, media halimar hela ho públiku nia opiniaun iha deit palku oin. Diskrisaun nebe fo sai ne’e senti susar atu ultrapasa husi media sira hodi  revela situasaun  real husi autor sira ne’e iha vida polítika ohin loron nian ho informasaun nebe kompletu. Kada figuras ho nia  esforsu tomak derepenti deit  media nakfilak sira nia an  sai tiha figura nebe pro ba povu hodi atakas ba ninia adversariu ho títlu  antagonista iha sena polítika ohin loron hodi hetan  boa imagem husi públiku. Maibe, públiku tengki toma mos notas ba sirkulasaun informasaun nebe mak fo sai husi media  kona ba autor politiku sira ne’e. Tamba palku nebe sira uza (media) nudar fatin  teatru ida nebe temporariu deit hodi  manifesta  realidade nebe mak iha.

Sintomas ba tipu informasaun hanesan ne’e bele ita hare husi  figuras  polítikas sira nebe  tenta revela  verdade hodi loke opurtunidade boot ba media atu halo investigasaun. Maibe media laiha vontade atu  kuntinua ho nia esforsus tomak hodi buka lia los ba kuntiudu tomak husi informasaoens nebe mak iha.  Karik media mos iha ona  intereses balun hodi  kuntinua mantein iha front stage deit hodi lakohi  fo sai  informasaun husi palku kotuk nebe públiku presiza mos atu hatene. Infelizmente, maske autor polítiku sira ne’e  tenta atu hatudu desempenh nebe diak hodi  apresenta lia los kona ba problema refere, mais defisil ba públiku atu hamosu analiza ida nebe imparsial hodi  kumpriende ho diak kuntiudu tomak husi prosesu ne’e tamba deit media kuntinua mantein iha FRONT STAGE tuir Goffman nia teoria.

Na realidade informasaoens sira nebe mak públiku asesu husi media ohin loron ne’e impressionadu tebes,  hodi fo sai ho barani ba titlu titlu sira nebe provokativus tebes entre lider sira. Ho  expressoens nebe media fo sai ba públiku entre hakarak atu eduka públiku ou atu soran lider sira, públiku to ohin loron seidauk hatene los pozisaun media Timor Leste hakarak atu lori ninia sidadaun ba  los dalan ida nebe husi informasoens hirak nebe publika sai husi meda sira. Realistiku ba situasaun politika ohin loron katak ita  nia media  sai tiha ona veíkulu hodi  realiza politika front stage ba figuras figuras balun no públiku akompanha deit husi palku oin.