Adeus Violénsia, Bemvindu Páz

DILI (TATOLI)—Bispu Dioseze Dili, Don Virgílio do Carmo hateten povu lakohi tan ona violénsia, maibé prefere páz tanba páz maka dalan ba dezenvolvimentu iha nasaun ida.

“Adeus violénsia no bemvindu páz. Ohin ita mai hamutuk iha ne´e hatudu katak ita hakarak páz maka atu ukun ita nia fuan no páz maka tenkiser sai abut no fundamentu ba rai doben ida ne´e,” Don Virgílio hato´o mensajen ne´e iha eventu Konsertu ba Páz ne´ebé hala´o iha Lecidere, Dili, 17 juñu ne´e.

Nia hatutan bainhira ko´alia kona-ba páz no estabilidade, ne´e la´ós baratu. La´ós fó saugati nomós la simu saugati. Lori ema rihun atus rua resin nia mate maka foin hetan páz. Ne´e duni, Bispu dehan, páz ba timoroan karun.

“Labele halimar ho páz. Tenki hanoin didi´ak molok halo asaun ruma kontra páz. Ita tenki hametin páz atu bele dada ema seluk mai iha Timor. Timoroan la´ós oin maka furak maibé laran mós tenki furak. Ema mai Timor hakarak koko timoroan sira nia di´ak. Ida ne´e orgullu timoroan ninian,” Amu Bispu haklaken.

Nia husu ba líder partidu partidu polítiku sira atu garante festa demokrasia iha kampaña eleisaun parlamentár sai festa demokrasia loloos no labele husik hela fali trauma iha ema barak nia moris liu-liu sira ne´ebé kiik, kiak no vulnerável.

Iha biban ne´e, reprezentante partidu polítiku sira ne´ebé partisipa iha Konsertu ba Páz ne´e promete katak sira sei garante páz iha kampaña eleisaun to´o eleisaun parlamentár. Sira dehan katak sira simu rezultadu hosi eleisaun jerál tanba ne´e nu´udar parte hosi demokrasia.

Jornalista: Xisto Freitas, Editór: Manuel Pinto

Foto: Bispu Dioseze Dili, Don Virgílio do Carmo. Imajen espesiál.