TDD Sei Hatun Desizaun Ba Emilia

DILI - Iha loron Kuarta (16/11/2016) oras tuku 16:00 otl, Tribunal Distrital Dili (TDD) sei foti desizaun forte hasoru arguida Emilia Pires ba nia hahalok, neebe durante nee halimar no la kumpri ba tribunal.

Tribunal hatete, liu husi julgamentu mak tribunal foin bele foti desizaun hasoru arguida Emilia Pires ho nia hahalok neebe mak durante nee la kumpri ba tribunal depois hetan autorizasaun hodi sai ba estranjeiru.

Ultimatum ikus mak tribunal fo tan tempu loron 8 ba arguida Emilia Pires hahu iha loron (4/11) too (11/11) hodi legaliza relatoriu medicu iha dokumentu nia laran, maibe arguida kontinua la kumpri no too agora. Tanba tribunal sei foti desizaun iha loron Kuarta (16/11/2016).

Tuir Advogadu Privadu Pedro Camoes neebe fo defesa ba Emilia Pires katak, desde halo operasaun iha loron (5/11) too agora nia parte seidauk simu informasaun ruma. Nia rasik manda ona mensajem no telefone, maibe nia kliente la fo resposta.

Audensia julgamentu nee prezide husi juiz kolektivu Jose Maria de Araujo, Francisca Cabral no Maria Solana Fernandes. Ministeriu Publiku reprezenta Prokuradora Angelina Saldanha, Lidia Soares no Jacinto Babo. Arguida Emilia Pires hetan asistensia legal husi Advogadu Privadu Pedro Camoes no advogadu Portugal nain ida. No arguida Madalena Hanjam hetan asistensia legal husi advogadu privadu, Jose Guterres akompana husi advogadu Portugal nain rua. Informasaun kompletu iha STL Jornal no STL Web, edisaun Kuarta (16/11/2016). Domingas Gomes

Suara Timor Lorosae