Bandu ParPol Utiliza Labarik Dansa iha Tempu Kampaña

DILI - Provedoria Direitus Humanus no Justisa (PDHJ) bandu partidu polítiku sira utiliza labarik minoridade iha tempu kampaña kesi bandeira iha isin lolon no konvida dansa bainhira partidu halo kampaña.

Provedór Silvério Pinto Baptista hateten, partidu polítiku labele utiliza labarik ki’ik bainhira kampaña, inklui bolu labarik sira halo dansa iha tempu kampaña eleitorál hahú.

“Partidu sira labele utiliza labarik sira iha tempu kampaña. Bolu labarik sira tara bandeira iha kakorok labarik sira nian ne’e labele. Labele konvida labarik sira atu halo dansa partidu sira bainhira kampaña”, dehan nia, iha Palasiu Prezidensiál, Ai‐Tarak Laran, Sesta (16/6).

Tuir nia, labarik sira seidauk tempu, eleisaun jerál festa demokrasia ne’e ba ema ne'ebé adultu, no ema ne'ebé rekizitu ho idade tuir lei hateten.

Tanba ne’e, Silvério dehan sira nia parte sei halo karta ida ba lider partidu polítiku sira atu labele envolve labarik sira iha prosesu e kampaña.

Entretantu, kona-ba fó sansaun ba asuntu ne’e sira nia parte sei diskute hela, Depois diskute hotu mak sei publika relatóriu.

“Ami seidauk ko'alia to’o iha ne’ebá, se hanesan ne’e sei publika relatóriu”, tenik nia.

Iha fatin hanesan, Prezidente Partidu Dezenvolvimentu Nasionál (PDN), Fernando Gusmão hateten, ne’e loos duni, iha lei eleisaun parlamentu ne’e bandu para partidu polítiku sira atu envolve labarik sira iha prosesu kampaña.

Maibé buat ida mak PDN haree katak, nu’udar partidu polítiku sira ne’e laiha interese ba labarik sira, tanba partidu sira ne’e presiza votu, presiza ema ne'ebé atu ba hili iha eleisaun parlamentár ne’e.

“Nune’e labarik sira la ba hili iha eleisaun. Portantu, partidu polítiku ami la presiza labarik sira mai tuir kampaña, tanba sira sei la hili”, dehan Fernando.

Tuir nia hanoin, autoridade seguransa sira iha kraik mak tenke iha knaar responsabilidade para kuandu labarik sira balun mai partisipa kampaña polítika ne’e, depois sira mak bele haruka labarik sira ne’e fila. La'ós, lider partidu polítika sira mak haruka atu sira fila.

“Labarik sira mai ne’e la'ós ami mak konvida, sira tanba de'it iha ema barak ne’e hanesan divertimentu ida ba labarik sira gosta mai haree, ne'ebé la'o partidu mak envolve sira, mais sira rasik mak hakarak rame‐rame mai lori haree,” dehan nia.

Tanba ne’e, autoridade sira mak tenke hala’o serbisu makaas atu haree no bandu labarik sira ne’e labele besik iha prosesu kampaña polítiku ne’e hahú.

Humberto dos Santos | Independente