KM Aprova Rezolusaun Extende Inskrisaun Seguransa Sosiál

DILI, (TATOLI) – Governu liuhosi reuniaun estraordináriu Konsellu Ministru (KM) aprova ona rezolusaun hodi extende inskrisaun rejistu ba kontribuisaun seguransa sosiál to’o 31 Dezembru tinan ida ne’e.

“Konsellu Ministru aprova tan estensaun ba rejistu kompañia ba traballadór ka funsionáriu sira mak atu kontribui ba seguransa sosiál,” Sekretariadu Estadu Komunikasaun Sosiál (SEKOMS), Nélio Isaac Sarmento ba Jornalista sira hafoin reuniaun estraordináriu KM iha Palásiu Governu, Tersa (29/8).

Nune’e nia haktuir, fulan hirak liubá governu aprova ona dekretu lei konaba kontribuisaun seguransa sosiál nian no hala’o ona sosializasaun. Agora daudaun Ministériu Solidariedade Sosiál (MSS) fó ona formuláriu ba ministériu sira hodi prienxe kontribuisaun seguransa sosiál no tanba kestaun tempu ne’ebé limite, iha ministériu balun no instituisaun públiku no privadu sira mós sidauk entende didi’ak konaba ninia lalauk, tanba ne’e extende tan.

Antes ne’e iha loron 7 Marsu 2017, KM aprova diploma husi Ministériu Solidariedade Sosiál (MSS) konaba rejime inskrisaun no obrigasaun kontributivu seguransa sosiál ne’ebé inklui mós rekomendasaun husi membru governu sira.

Haktuir iha portal ofisial governu, diploma ida ne’e define prinsípiu no regra inskrisaun ba traballadór no entidade empregadora rejime jerál nian, determina responsabilidade ba obrigasaun kontributivu, estabelese baze insidénsia kontributivu, fixa taxa kontributivu, define ona regra sira konaba pagamentu no aprezentasaun dokumentu Seguransa Sosiál no kritériu sira atu halo rejistu kona-ba Remunerasaun no tempu servisu nian.

Diploma ne’e mós regula konaba garantia Seguransa Sosiál nian, kumpre obrigasaun kontributivu, husi dívida ba Seguransa Sosiál no rejime kontra ordenasaun espesífika iha ámbitu rejime kontributivu ba Seguransa Sosiál.

Iha sesaun parlamentár loron 21 Setembru 2017, proposta lei kriasaun rejime kontributivu seguransa sosiál husi governu ne’e hetan apresiasaun no membru Parlamentu Nasionál (PN) sira hotu hatán ho unanimidade (simu ho lian ida de’it).

Entretantu rejime kontributivu Seguransa Sosiál hatuur iha prinsípiu internasionál liuhusi teste iha área Seguransa Sosiál nian. Ninia tratamentu husi rejime úniku ba traballadór sira iha setór hotu-hotu,  kontributivu no obrigatóriu signifika obriga ema ida-idak atu kontribui ba di’ak hotu nian.

Kustu ne’ebé fahe entre traballadór sira no ninia entidade empregadór sira mak hanesan valór ne’ebé atu selu ba prestasaun sosiál nian. Osan restu sira sei ba tau iha fundu komún (Fundu rezerva Seguransa Sosiál ).

Fundu ne’e sei garante katak, bainhira ema sira ne’ebé halo kontribuisaun menus no ema ne’ebé mak simu barak liu, rejime Seguransa Sosiál nian kontinua fó osan hodi selu prestasaun no la presiza husu ba jerasaun sira tuir mai ninia kontribuisaun hodi garante ba sira ho benefísiu ne’ebé hanesan.

Sistema hatuur ona prinsípiu sira igualdade, ekuidade, solidariedade sira entre jerasaun sira no iha jerasaun sira ne’ebé hanesan no husi responsabilidade públika nian, tuir prevee ona iha Konstituisaun Repúblika nian.

Husi esforsu kontributivu nian (obrigasaun), traballadór sira no ninia família sira hetan protesaun iha situasaun moris hanesan maternidade, paternidade no adosaun idozu, defisiente no mate liuhusi subsídiu no pensaun.

Jornalista: Julia Chatarina | Editór: Manuel Pinto

Foto: Reuniaun Estraordinariu Konselhu Ministru iha Palasiu Governu, Tersa (29/8). Foto: GPM