Presiza Hadia Tasi-Ibun Pantai Kelapa

DILI - Tasi-ibun Pantai Kelapa iha sentru Kapital Dili nee duni presiza governu hadia diak liutan, labele husik abandona.

Hateten Deputadu Paulino Monteiro husi Bankada PD ba STL iha PN, Tersa (22/8/2017). Tuir Paulino katak, durante tinan lima (5) nia laran nee nia laharee Ministeriu Turimu no Kultura nia servisu satan implementasaun laiha liu.

Tanba nee husu ba governu foun mai liuliu Ministeriu Turismu no Kultura presiza hadia tasi-ibu sira neebe mak iha Sidade Dili. Nunee mos, hadia tasi-ibun sira iha Munisipiu sira seluk. Tanba tasi-ibun balun iha Munisipiu ninia furak bele atrai turista sira Timor-Leste.

Deputadu nee salenta liutan, hanesan tasi- ibun iha Liquica, Lospalos, Uatulari Viqueque,  Modo-Mahut Fatuberliu, Betano Same Manufahi, Suai no fatin sira seluk. Presiza governu liu husi Ministeriu Turismu desemvolve didiak, tanba fatin sira nee bele atrai turista sira husi rai liur no rai laran.

Tuir observasaun STL notak katak tasi-ibun Tutuala ou Pulau Jaco furak teb-tebes, bainhira governu desemvolve didiak bele atrai turista sira husi rai liur no rai laran. Tanba fatin nee furak teb-tebes husi tasi ibun Tutual mai too Kom.

Nunee mos fatin sira seluk hanesan tasi ibu Modo-Mahut Postu Administrativa Fatuberliu lagua neebe nia luan kuaze hektares 20 resin.

Ho nia tasi ibun matak no furak teb-tebes, nomos fatin sira seluk bainhira governu liu husi Ministeriu Turismu no Kultura desemvolve didiak bele atrai turista sira nomos bele hatama returnu ba Estadu. 

Augusto da Costa | Suara Timor Lorosae