Governu portugés: Embaixada iha Díli loke fali hanesan baibain

Xefe diplomasia portugeza hatete ona ba Lusa katak embaixada portugeza iha Dìli funsiona iha loron-tersa ne'e hanesan baibain, hafoin tenki taka iha loron-segunda tanba "momentu tensaun ida" ne'ebé halo hosi "grupu ki'ik ida".

Asaun violenta sira hosi grupu ida joven sira ne'ebé tenta hakarak tama iha embaixada portugeza iha Díli, tanba ladún kontente ho prosesamentu kleur hosi sira nia pedidu ba nasionalidade, nune'e maka taka misaun diplomátika iha loron-segunda ne'e.

Ohin, situasaun hanesan baibain, haktuir hosi ministru Negósiu Estranjeiru portugés, Augusto Santos Silva, ne'ebé la valoriza buat ne'ebé maka nia hatete hanesan "tentativa hodi provoka situasaun ladi'ak maibé falla ona", nia fiar katak ne'e hanesan de'it "epizódiu ida" ne'ebé halo hosi "grupu ki'ik ida ne'ebé maka dook tebes" hodi reprezenta ema sira ne'ebé maka ba iha embaixada portugeza ne'e.

Ministru ko'alia ba Lusa iha tuku 10:00 (oras Lisboa), tuku 18:00 (oras Timor-Leste nian).

"Ha'u iha ona konversa naruka ho enkaregadu negósiu Portugal nian iha Díli hodi hatene saida maka akontese no oinsá ritmu atendimentu ba ema sira. Informasaun sira ne'ebé maka ha'u simu halo ha'u hasai konkluzaun katak iha hela atendimentu razoável ida, iha prazu razoável sira, iha atendimentu no mós iha prosesamentu ba pedidu sira", nia hatete.

Embaixada iha diplomata portugés na'in rua no funsionáriu timoroan na'in tolu no simu loron-loron "ema sanulu resin, bele to'o ema atus resin".

"Ema sira tenki iha kalma oituan no respeitu", nia defende.

Tensaun iha embaixada akontese tanba volume aas hosi pedidu sira hodi hetan nasionalidade portugeza, ne'ebé hanesan asesível ba timoroan sira ne'ebé moris to'o loron 19 Maiu 2002, antes loron ne'ebé maka Timor-Leste halo restaurasaun ba nia independénsia.

Lei nasionalidade nian konsidera katak to'o iha loron ne'e no tanba Timor-Leste uluk hanesan teritóriu ida la'ós auto-governadu hosi administrasaun portugeza nian, sidadaun timoroan tomak ne'ebé moris to'o iha loron ne'ebá bele husu nasionalidade.

Ne'e implika, iha média, katak embaixada loron-loron simu pedidu nasionalidade hamutuk 60 resin, ho fila naruka hosi ema sira ne'ebé loron-loron hamriik iha embaixada nia odamatan, ne'ebé iha fulan ne'e muda ona ba instalasaun foun sira.

Santos Silva esplika ona katak atendimentu iha seksaun konsular iha Díli funsiona, hanesan iha nasaun sira seluk, liuhosi markasaun eletrónika, maibé "iha baibain ema sanulu resin ne'ebé, maski hatene, ba rasik hodi tenta hetan atendimentu iha loron ne'e duni ka hodi halo markasaun", nune'e "halo konfuzaun ba prosesamentu hosi asaun konsular sira".

Governante indika ona katak markasaun, liuhosi dalan dijital, agora daudaun demora loron 15 resin, ezemplifika katak utente ida ne'ebé tenta halo markasaun, iha loron-tersa, ba atendimentu ida, sei la hetan fatin to'o loron 06 Novembru, no liutiha loron ne'e maka foin bele halo markasaun.

Portugal ho Timor-Leste iha akordu ida izensaun vistu nian nune'e deslokasaun sira la to'o loron 90 la presiza husu vistu. Vistu Schengen demora besik semana ida hodi fó sai.

Demora liu maka prosesu hetan nasionalidade, ne'ebé bele to'o "fulan barak nia laran no to'o tinan ida", tanba "halo tuir protokolu sira hosi verifikasaun ba autentisidade hosi dokumentu sira moris nian no seguransa nian".

"La'ós hanesan fó vistu ida maibé fó sidadania portugeza, ho nia direitu tomak", hatete hosi Augusto Santos Silva hosi hatutan katak la'ós tanba "situasaun urjénsia" ida.

Hatán kona-ba karik admiti atu reforsa funsionáriu konsular sira iha Díli, ministru hatete katak postu ne'e la'ós konsidera hanesan prioritáriu, maibé ministériu "sei akompaña ritmu serbisu nian".

SAPO TL ho Lusa