Institutu amerikanu: Rai-nakdoko iha Timor-Leste iha magnitude 6.7

Rai-nakdoko ne'ebé senti iha loron-tersa ne'e iha Timor-Leste iha magnitude 6,7 iha eskala Richter nian, informa hosi institutu jeolójiku norte-amerikanu (USGS), hafoin konjéneru europeu adianta ba magnitude ida ho 6,5.

Tuir sentru norte-amerikanu, rai-nakdoko ne'e rejista iha Tasi Banda, ho klean kilómetru 549 no distánsia ida kilómetru 262,8 hosi Pante Makassar, iha Timor-Leste.

Sentru Sismolójiku Europeu-Mediterániku nian (EMSC) informa antes katak rai-nakdoko ida ho magnitude 6,5 senti iha loron-tersa ne'e iha Timor-Leste iha tuku 19:47 (oras lokal), ho kilómetru 309 hosi noroeste Díli nian, ho klean kilómetru 557.

Rai-nakdoko ne'e senti iha Díli, kapital Timor-Leste nian, maibé laiha rejistu ba estraga fíziku ka material nian.

Autoridade sira iha Indonézia hatete mós katak laiha vítima ida ka estraga ruma.

Iha tinan 2004, rai-nakdoko maka'as ida akontese iah norte illa Sumatra nian ne'ebé hamosu tsunami ida ne'ebé halo ema na'in 230.000 mate iha rejiaun tasi-ibun sira hosi Oseanu Índiku, maioria iha Indonézia.

Rejiaun ne'e halo parte hosi Ring of Fire hosi Pasífiku, zona ida ho atividade sísmiku no vulkániku maka'as ne'ebé tinan-tinan rejista rai-nakdoko 7.000 resin, barak liu hanesan moderadu.

Tuir USGS, 90% hosi rai-nakdoko sira ne'ebé maka rejista iha mundu akontese iha Ring of Fire hosi Pasífiku.

SAPO TL ho Lusa