Ministeriu Edukasaun Hahu Prepara Materia Ba Izame Nasional

Ministeriu Edukasaun hahu prepara materia ba ezame nasional durante semana tolu nia laran to’o dia 18 Outubru tinan 2017 nian.

Diretor Jeral Ministerio Edukasaun (DJ-ME), Antoninho Pires hateten material ba ezame tenke imprime hotu ona antes tama ba ezame nasional ne’ebe sei hala’o iha dia 23 Outubru 2017.

“Ami komesa prepara pontus atu print, sura-tahan atu print materia sira e kontiudu tomak ezame nasional nian,” DJ Pires hateten, iha nia knar fatin Vila-Verde, Dili.

Nia hateten, materia ne’ebe tama iha ezame nasional ne’e difinidu ona iha kurikulum ninian. Ba eskola Pre-sekundario mak lian Portugues, Ingles , Matematika, Siensia Fisika Naturais no Historia inklui Geografia.

Enkuantu ba nivel Sekundario Jeral, nia dehan fahe ba rua: Siensia Teknologia nia mak lian Portugues, Ingles, Matematika, Fisika, Biologia no Kimika. No ba Siensia Humanidade nian mak lian Portugues, Ingles Ekonomia e Metodu Kuantitativus, Historia, Geografia no Sociologia.

“Ba eskola teknika vokasionais mak Portugues, Ingles , Matematika ,Fisika, Kimika no Ekonomia. Ba fali eskola ekonomia comersio nian mak Portugues, Ingles, Matematika, Ekonomia, Metodus kuantitativus, no Sociologia. Materia hirak ne’e displina sira ne’ebe iha kurikulum sasional,” nia hateten.

Iha parte seluk Sekretario Nasional rede edukasuan Timor-Leste Coalition for Education (TLCE), Jose Monteiro espera katak materia ezame nasional ne’ebe ministeriu prepara tuir nia tempu no sufisiente ba alunu sira.

“Ita labele kontinua hela deit sala ne’ebe ita halo ona, hanesan materia ezame tama tarde no la to’o ba estudantes, entaun profesores ba kopia fali mak fo ba sira, espera ida ne’e la repete tan,” nia esperansa.

Tanba tuir nia, ida ne’e fo impaktu ne’ebe la diak ba estudante sira atu bele tuir ezame ho diak, bele mos fo presaun ba sira nia hanoin no ikus mai bele kauza ba sira nia notas ba ezame naisonal.

Entretantu estudante terseiru ano Siensia Teknologia husi Eskola Publiku 4 de Setembru, Zeferino Agus Pereira hateten nia preparadu atu tuir ezame nasional.

“Tanba ami nia professor sira hanorin ami tuir duni materia ne’ebe iha no sira halo rezumu materia husi primeiru ano to’o terseiru ano, fo ami estuda hodi prerapa ba ezame nasional,” nia hateten.

Nia dehan, materia sira ne’ebe professor sira halo rezumu ne’e foti husi pontu ezame sira ne’ebe liu tiha ona depois halo fali rezumu hodi sira bele estuda.

Celestina Soares, Est. | The Dili Weekly