Kaer J Gama, PNTL “Agradese” POLRI

DILI, (TATOLI) - Polísia Nasionál Timor-Leste (PNTL) husu agradese ba POLRI (Kepolisian Negara Republik Indonesia) tanba ho kooperasaun ne’ebé di’ak, ohin loron bele kaer ona fugitivu Juga Gama, ne’ebé halai sai hosi komarka Bekora iha tinan hat liu ba (2013-red).

Segundu Komandante Jerál Polisia Nasionál Timor-Leste (PNTL), Faustino da Costa, haktuir, fugitivu ne’e ita kaer tanba iha kooperasaun entre Embaixada Indonézia iha Timor-Leste no adidu seguransa POLRI nian.

“Hodi Komandu PNTL agradese ba Embaixada Indonézia iha Timor-Leste, Polisia Repúblika Indonézia liuliu ba POLDA Bali ho esforsu tomak durante fulan barak nia laran hodi kaer fugitivu no ohin ita bele lori fila no tenke submete ba prosesu tuir lei ne’ebé iha,” Komandante Faustino da Costa informa liuhosi konferénsia imprensa iha Aeroportu Internasionál Nicolau Lobato, ohin.

Faustino da Costa, informa, Juga Gama halai sai hosi komarka Bekora iha loron, 3 Novembru 2013, no ohin halo tinan hat (03 Novembru, 2017) mak foin POLDA Bali ka’er fugitive hodi entrega ba PNTL iha Aero Portu Nikolau Lobato.

“Ohin ita simu nia “Juga Gama” hanesan fugitivu  ne’ebé halai lakon iha prizaun Bekora iha 3 Novembru 2013 to’o mai 3 Novembru 2017, signifika nia tinan haat iha li’ur.” Segundu Komandante Polisia Nasionál Timor-Leste (PNTL), realsa. Hodi dehan tan,  fugitivu Juga Gama to’o iha Aeroportu Internasionál Nicolau Lobato ho Aviaun Srywijaya Air, iha tuku 13:45, oras Timor-Leste.

Iha fatin hanesan, Embaixadór Indonézia iha Timor-Leste, Sahat Sitorus agradese tebes ba nasaun rua (Indonézia-Timor Leste) tanba hatudu prestasaun servisu di’ak hodi kaptura fugitivu Juga Gama hodi lori fila mai Timor-Leste.

“Timor-Leste susesu tanba halo kooperasaun di’ak ho Indonézia liuhosi PNTL ho Polisia Indonézia nian hodi kaer kriminozu ne’e.”

Nia husu atu Polísia nasaun rua ne’e nia kontinua garante kooperasaun servisu hodi halakon kriminozu sira ne’ebé komete krime iha rejiaun.

“Ami fó parabéns ba PNTL tanba servisu kooperasaun hatudu prestasaun di’ak, tanba ne’e kriminozu sira labele fó perdaun no buka autór kriminozu sira seluk,” nia husu.

No kontinua hatudu vontade atu koopera nafatin ho Timor-Leste hodi prevene kriminozu iha rejiaun Asian no Pasífiku.

Fugitivu Juga Gama deskonfia involve iha atividade tranzasaun Droga, nune’e Ministériu públiku kondena hodi simu kastigu tinan 10, tanba iha loron 11 Dezembru 2012 Juga Gama deklara ba tribunal katak, Polisia Nasionál Timor Leste bainhira kaer nia (J. Gama-red) polísia konsege prende mós Droga ho tipu Sabu-sabu kuaze 200 ital grama inklui osan.

Entretantu fugitivu Juga Gama kaptura, iha loron, 27, Outubru, mais ou menus tuku 01:30 oras Indonézia nian, iha uma aluga nian (kost).

Fugitivu kaptura iha dalan, Tukad Badung XVI, Renon, Dempasar Súl hosi team Resnarkobaho Satgas CTOC Polda Bali.

Durante moris iha Bali, fugitivu hela ho nia doben ema indonézia hosi parte Java, no tuir investigasaun Polísia Bali nian, fugitivu tama iha Indonézia iha fulan Novembru tinan 2013.

Nia tama iha area Indonézia liuhosi fronteira Atambua no hela iha Bali, Fugitivu servisu iha empreza peska nian ida, iha portu Benoa

Jornalista: Zezito Silva | Editór: Manuel Pinto