“Liafuan Ne’e Kilat”

DILI, (TATOLI) – Poeta no eskritór timoroan sira, segunda, (30/10) kalan iha eis Komarka Balide, lansa livru poema ho títulu Biti-boot no Bua-malus Ukun nian: Ontolozia Poema Timoroan, objetivu mak promove literatura no atividade leitura iha Timor-Leste.

Poeta timoroan sira ne’e mak Dadolin Murak, Hugo Nahabere Fernandes, Gil Mauberismo, Maini Calado, Avan Pedro, Dino Hanjam, Esteviana Amaral, José Estevão Soares-Zeca, Abe-Jenuvem Eurito, Moises Cardoso, Rafy Belo Atl, Djoe, Kukur Lasakar, L´ki Rubic, A. Castro no Carmeneza dos Santos Monteiro.

Poeta ida, Hugo Fernandes iha introdusaun ba lansamentu hateten, hafoin haree no sani tuir lia kmanek sira iha laloran anin facebook nian, nia sara lia ba Dadolin Murak katak di’ak tebes atu hakerek dadolin iha livru nu’udar tatada ida iha istória, liu-liu oinsá mak husik hela ba jerasaun kona-ba loron no oras  ne’ebé lala’ok sira ne’e mosu.

“Ha’u sani livru ida husi segundu komandante Marcos, funu-na’in emar (orijinál) meksikanu nian ho títulu Kata adalah senjata-Liafuan ne’e kilat, livru ne’e ko’alia kona-ba oinsá mak liafuan sira ne’ebé lekar husi ibun ba ibun, husi anin nomós surat-tahan sira fanun no loke ema nia neon”, haktuir.

Poeta ne’e mós haktuir tan, nia mós haree filme Cry for Freedom (tanis ba liberdade), drama épiku ida kona-ba Áfrika Sul nian no iha filme ne’e, iha mós dialogu entre Steve Bico, funu-na’in revolusionáriu Áfrika Sul nian ho juíz iha tribunál kona-ba ativizmu Steve Bico nian.

Juíz ne’e husu ba nia tansá mak hamosu konfrontasaun? Steve Bico hatan ba juíz ne’e hodi dehan: “Dadaun ne’e ita rua halo hela konfrontasaun, maibé la iha ema ida mak mate”.

Nune’e, poeta Hugo fiar katak liafuan kro’at, todan no moruk sira bele hanorin mai ita kona-ba oinsá mak haree tempu ida, lala’ok ida nomós fó hela dalan ida oinsá mak iha hahilik wa’in hodi foti.

“Hein katak, kolesaun dadolin koligasaun sira ne’e, bele sai nu’udar biti ida ne’ebé ita nahe hela no iha biti ne’e nia leten, ita lekar liafuan kro’at, todan no moruk sira hodi fó hela dalan oi-oin ba ita hili tuir ita neon haruka. Biti nahe ona, lia hato’o ona-lia hatete ona”, nia espera.

Poeta ida mós, Carmeneza dos Santos Monteiro afirma, nia hakerek puízia eh poema ho sentimentu no reprezenta sentimentu temporál tuir tempu.

“Ne’ebé, la nesesariamente reprezenta ha’u-nia sentimentu agora”, subliña poeta Carmeneza dos Santos Monteiro bainhira hahú lee poema ne’ebé aprezenta mós husi poeta ida-idak perante audiénsia sira akompañadu ho múzika klásika.

Poeta no eskritora, Esteviana Amaral bainhira dada-lia ho ajénsia TATOLI akresenta, nia iha vontade no kompromisu atu hakerek nafatin tuir nia kbiit, nu’udar meius ida hodi promove literatura ho lian tetun, maibé ba futuru, nia espera, bele iha péritu literatura ruma, bele fó krítika konstrutiva no sujestaun ruma tan, nune’e nia bele hadi’a án bebeik hodi bele sai profisionál liutan.

Livru poema ho títulu Biti-boot no Bua-malus Ukun nian: Ontolozia Poema Timoroan, ne’e dezeña husi dezeñadór Zéray Caminha ho publikasaun husi Dadolin Kmanek nu’udar edisaun dahuluk.

Entretantu, tuir planu, dezembru tinan ne’e, sei lansa tan livru poema ida nu’udar edisaun daruak nian iha ámbitu hodi komemora loron invazaun militár Indonézia nian mai Timor, iha 7 dezembru 1975.

Jornalista: Rafy Belo | Editora: Rita Almeida

Foto: Livru poema ne’ebé lansa husi poeta timoroan sira. Foto: Rafy Belo