Catalunha-Madrid: DIÁLOGU IMPOSIVEL

Catalunha: Puigdemont kompromete aseita rezultadu hosi eleisaun fulan-Dezembru nian

31 de Outubro de 2017, 21:53

Prezidente demitidu Catalunha nian, Carles Puigdemont, hatete iha loron-tersa, iha Bruxelas, katak diálogu ho Madrid sai hanesan "imposível", hodi hatutan katak sei partisipa no respeita rezultadu hosi eleisaun rejional sira loron 31 Dezembru nian.

Puigdemont ko'alia iha konferénsia imprensa ida iha Bruxelas, fatin ne'ebé nia halo viajen iha loron-segunda ne'e akompaña hosi eis-membru na'in lima hosi governu autónomu Catalunha nian, ne'ebé hatún tanba aplikasaun hosi artigu 155 hosi Konstituisaun española nian.

SAPO TL ho Lusa

Catalunha: Tribunal Konstitusional españól anula deklarasaun independénsia nian

31 de Outubro de 2017, 22:33

Tribunal Konstitusional españól anula ona iha loron-tersa ne'e, iha Madrid, deklarasaun independénsia Catalunha nian ne'ebé maka aprova iha loron-sábadu liubá hosi parlamentu rejiaun nian, bainhira aseita ba julgamentu reklamasaun ne'ebé maka aprezenta hosi Governu españól.

Fonte jurídiku sira ne'ebé haktuir hosi ajénsia Efe informa ona katak TC hetan ona akordu kona-ba desizaun ne'e hafoin ezekutivu iha Madrid husu ona katak, tuir Konstituisaun, bele ativa artigu ne'ebé garanti suspensaun kautelar automátiku hosi rezolusaun rua ne'ebé aprova hosi Parlamentu katalaun iha loron-sesta, 27 Outubru: deklarasaun independénsia nian no inísiu hosi prosesu konstituinte.

Parlamentu rejional Catalunha nian aprova ona iha loron-sesta liubá independénsia rejiaun nian, iha votasaun ida lahó prezensa hosi opozisaun, ne'ebé husik asembleia rejional no husik bandeira españól sira iha sira nia fatin.

Iha tempu hanesan, iha Madrid, Senadu españól fó ona autorizasaun ba Governu hodi aplika artigu 155 hosi Konstituisaun hodi restabelese legalidade iha rejiaun autónomu.

Mariano Rajoy nia ezekutivu, hosi Partidu Popular (direita), apoia hosi partidu boot opozisaun nian, sosialista sira hosi PSOE, fó sai ona katak sobu parlamentu rejional, hala'o eleisaun sira iha loron 21 Dezembru oinmai no hatún Governu katalaun tomak, no medida sira seluk tan.

Iha loron-sábadu, prezidente hosi governu rejional ne'ebé maka demitidu, Carles Puigdemont, hatete katak la aseita nia afastamentu no husu ba ema katalaun sira hodi halo "opozisaun demokrátiku" ida, iha deklarasaun ofisial ida ne'ebé grava antes no transmiti iha diretu hosi televizaun sira.

Maibé, iha loron-segunda, Puigdemont halo viajen ba Bruxelas akompaña hosi eis-membru na'in lima hosi governu autónomu Catalunha nian.

SAPO TL ho Lusa