Governu timoroan aprova ona, iha
loron-kinta ne'e, mudansa ba dekretu polémika rua tinan 2015 ne'ebé hatama uzu
hosi lian inan iha pré-eskolar no hahú hosi ensinu báziku, tau portugés hanesan
lian prinsipal hahú de'it hosi siklu datoluk.
Lurdes Bessa, visi-ministru
Edukasaun, esplika ona ba Lusa katak dekretu-lei rua ne'ebé aprova iha
loron-kinta muda ona, relativamente, ba dekretu 3/2015 kona-ba kuríkulu
nasional hosi baze edukasaun pré-eskolar no 4/2015 kona-ba kuríkulu hosi siklu
dahuluk ho siklu daruak hosi ensinu báziku, halo parte hosi estabelesimentu
tomak edukasaun nian hosi rede públika.
"Buat ne'ebé maka ami halo
maka avansa ho proposta mudansa sira ba dekretu rua ne'ebé defini uzu hosi lian
inan iha sala aula", Bessa esplika iha deklarasaun sira ba Lusa.
Nia esplika katak mudansa sira
reflete ba programa sira hosi partidu rua hosi koligasaun Governu nian, Frente
Revolucionária do Timor-Leste Independente (Fretilin) ho Partidu Demokrátiku
(PD) - no mós hosi rezultadu sira hosi Kongresu Nasional datoluk Edukasaun nian
ne'ebé hala'o iha tinan liubá iha Díli.
Sentra iha "mudansa boot
haat", dekretu sira ne'ebé aprova iha loron-kinta abranje kestaun sira
hanesan "definisaun hosi lian ofisial sira ho lian sira ensinu nian, fó
prioridade ba portugés hanesan lian ensinu nian no ba tétun hanesan lian
suporte nian".
Lian nasional sira defini ona
hanesan "patrimóniu kultural ho istóriku, hodi iha tratamentu di'ak iha
área ne'e", esplika hosi visi-ministra.
Governu desidi mós aumenta karga
horáriu mínimu hosi ensinu pré-eskolar, hosi oras rua ba oras haat loron-loron,
sei ajusta mós karga horáriu "ba ensinu ho kapasidade linguístiku iha
tétun ho portugés", nia hatutan.
"Kuríkulu atual la haketak
sira no fó karga horáriu ne'ebé ki'ik tebes. Ami fahe fali ne'e no kona-ba
ensinu báziku iha kompeténsia sira iha lian portugeza, iha nível sira
pré-eskolar no báziku, ami aplika karga horáriu ida hanesan ho karga horáriu
ida hosi ensinu ba matemátika", nia hatutan mós.
Testu sira mudansa nian inklui
mós kestaun rua seluk, liuliu ensinu inkluzivu "ne'ebé laiha previzaun
antes", hatama edukasaun psikomotora iha pré-eskolar no edukasaun fízika
iha báziku.
Iha defeza ba nia proposta iha
Konsellu Ministru sira, Ministériu Edukasaun destaka "nesesidade hosi
estabilidade no koerénsia iha aplikasaun hosi polítika edukativu sira iha
Timor-Leste" no mós "nesesidade hodi klarifika pozisaun sira ne'ebé
refere ba lian sira no uza iha sistema edukativu".
"Implementasaun hosi
polítika edukativu sira iha Timor-Leste, sei orienta ho koerénsia no
konsistente, hodi salvaguarda polítika ne'ebé haktuir iha Lei no mós prezerva
ita nia kultura étniku, úniku iha mundu, iha tempu hanesan ita dezenvolve
sistema ida hosi ensinu inkluzivu ne'ebé permiti igualdade hosi asesu ba
oportunidade sira formasaun hosi sidadaun timoroan tomak", hatete hosi
dokumentu.
Dekretu-lei, ne'ebé agora sei
tuir prosesu normal hosi publikasaun no sei hala'o hahú tinan 2019, bele sai
hanesan dekretu ikus ida hosi Governu konstitusional dahitu tanba iha
loron-sesta Prezidente Repúblika sei hato'o solusaun ida ba difikuldade
polítika atual ne'ebé maka nasaun hasoru.
Bainhira hili senáriu fahe
parlamentu ka demiti ezekutivu,Governu sei iha jestaun hodi nune'e implika atu
iha poder lejislativu ne'ebé limitadu.
"Bele hanesan dekretu ikus
ida. Maibé bainhira ami iha funsaun sira ami serbisu daudaun. Iha Ministériu
Edukasaun ami presiza liña orientadora ida tuir ho ami nia polítika sira no
programa sira. Ne'e hanesan baze hodi ami halo serbisu", Lurdes Bessa
afirma.
SAPO TL ho Lusa
Sem comentários:
Enviar um comentário