Kompañia Halo Ró HAKSOLOK Iha Dívida, La’ós Governu

DILI, (TATOLI) - Primeiru Ministru, Mari Alkatiri esplika Ró Ahi “HAKSOLOK” seidauk to’o iha Timor la’ós, la’ós governu nia kulpa, maibé kulpa kompañia halo Ró Ahi nian, iha Dívida, nune’e sira lori malu ba Tribunál, Timor sei prepara advogadu atu akompaña prosesu.

“Loron ida ou rua ita prepara hodi nomea advogadu atu akompaña prosesu tanba Timor-Leste la’ós hola parte iha konflitu, maibé problema ne’e entre sira kompañia ho sub-kontratór ne’ebé halo ró sei iha dívida,” Primeiru Ministru, Mari Alkatiri ba jornalista sira iha Salaun Ministériu Obras Publika iha Merkadu Antigu, Kuarta (11/01).

Ró Ahi HAKSOLOK Antes ne’e Vise-ministru Obras Públika, Transporte no Komunikasaun, Inácio Moreira informa katak nia produsaun iha Portugál ne´e, nia espesifikasaun dezeñu no modelu modernu, tanba ne’e bele halo mós operasaun iha Kosta Súl, tasi mane kompara ho Berlin-Nakroma I ne´ebé apoiu husi governu Alemaña antes ne´e.

Enkuantu iha loron 26 Maiu 2017, iha sidade Figueira da Foz, ho prezensa Dr. Mari Alkatiri, nu’udar Prezidente Autoridade Região Especial Oe-Cusse-Ambenu, Vice-Ministru dos Transportes e Comunicações da Repúblika Demokrátika de Timor-Leste, Eng. Inácio Freitas Moreira, ho tan konvidadus malae mutin no timor oan, akompaña  Dom Carlos Filipe Ximenes Belo fó bensaun ba ró HAKSOLOK no Madre Provincial, Me. Guilhermina hanesan inan sarani.

Tuir Dom Ximenes Belo, Ró Ahi HAKSOLOK, boot no modernu, atu bele halo ligasaun hosi tasi, hosi Dili ba Oe-Cusse, Ataúru, Indonézia no Australia. Ró “Halsokok” nia iha kapasidade atu tula ema na’in 377 (tur ka “sentadas”), no viatura karreta sanulu resin lima., tanba ne’e nia folin boot ho valor osan: Euro: 13,7 milhões.

Hatán ba problema tansá Ró HAKSOLOK seidauk mai, Primeiru Ministru Alkatiri afirma, ró “Haksolok” la’ós problema governu no Estadu maibé problema entre estaleiru ho sub-kontratór tanba ho dívida ne’ebé sira halo.

“Ró “HAKSOLOK” labele sai lai tanba dívida hosi kompañia halo ró nian, agora kompañia sira lori malu hodi ba rezolve liuhosi tribunál,” Alkatiri haktuir.

“Ró “Haksolok” seidauk entrega mai Timor-Leste tanba ne’e ita seidauk halo pagamentu hotu eh sei iha retensaun no ita la iha dívida ho ema eh ZEEMS la iha dívida ho estaleiru.”

Iha fatin hanesan Vise Ministru Obra Publika no Telekomunikasaun, Inácio Moreira reforsa katak problema ró “Haksolok” nia prosesu seidauk hotu, Tersa Feira (la sita semana ida ne’ebé) mak akuzadu (Estaleiru) sei ba defende-an no sei ba hato’o informasaun eh depoimentu iha tribunál.

“Públiku lalika jeneraliza, ró ne’e kuaze porsentu 85 ona no hela de’it porsentu 15 atu finaliza no tinan ida ne’e ró ne’e bele mai ona,” Inácio garante.

Jornalista: Zezito Silva | Editór: Manuel Pinto