DISKURSU HOSI S.E. PREZIDENTE
REPÚBLIKA DEMOKRÁTIKA TIMOR-LESTE, DR FRANSCISCO GUTERRES LÚ OLO IHA LORON
ERÓIS NIAN
Monumento Nicolau Lobato
Díli, 31 Dezembru 2017
Exelénsia Sira!
Sr.Prezidente Parlamentu
Nasional, Dr Aniceto Guterres
Sr.Primeiru-Ministru, Dr Mari
Alkatiri
Venerandu Prezidente Tribunal
Rekursu, Dr Deolindo dos Santos
Señoras no Señores Deputadus
Señoras no Señores Membrus VII
Governu Konstitusionál
Señores Reprezentantes hosi
Konfisaun Relijioza sira
Membrus Korpu Diplomátiku no
Konsulár
Dirijentes no ativistas hosi
organizasoens sosiedade sivíl
Kombatentes no veteranus Luta
Libertasaun Nasional
Belun konvidadu no maluk sira
hotu,
Ohinloron, ita hateke liuliu ba
oin, ba ita-nia futuru! Ita hanoin futuru ita-nia oan sira-nian no beioan sira
nian! Ita hanoin futuru rai ida ne’e nian! Ita hotu preokupa oinsá ita hametin
babeibeik ita-nia Unidade Nasionál no oinsá ida-idak kontribui ba páz no
estabilidade. Ita ida-idak buka no fó-hanoin malu atu hametin buat sira ne’e hotu,
atu ita bele hala’o dezenvolvimentu nasionál ho di’ak, atu hotu-hotu hetan
moris-di’ak abanbairua.
Maibé atu haree’e ba ita-nia
futuru ho sentidu responsabilidade, ita hotu tenke haree mós ba kotuk, ba
ita-nia pasadu, nu’ udar povu. Ita tenke hatene saída loos mak akontese
horiuluk, atu foti hosi esperiénsia pasadu nian, referénsia no lisaun di’ak ba
ohinloron no abanbairua. Sosiedade ne’ebé aposta iha futuru tenke honra ninia
pasadu.
Bainhira ita halo peregrinasaun
ba ita-nia pasadu, tinan hat nulu resin liubá, ita hanoin-hetan figuras
importantes, maluk sira ne’ebé hahú mehi boot ida ba ita hotu, nu’udar povu ida
de’ it. Mehi ne’e mosu atu hasa’ e ita hotu ninia dignidade nu’udar ema. Mehi
ne’e fanun ita idak-idak, iha rai-laran no iha tasi-balun. Neineik-neineik,
liuhosi hahalok pasiente no persistente, mehi ne’ebé hahú husi grupu
nasionalista kiik ida, da’it ba família ida-idak, knuak ida-idak, aldeia
ida-idak, suku ida-idak no ikus mai, nakfilak ba mehi povu tomak nian. Ida ne’e
fenómenu foun ida ne’ebé halo ita hotu sente orgullu tebes.
Mehi hosi grupu kiikoan ida
nakfilak ba kauza nasional: UKUN RASIK-AN.
Figuras importantes sira ne’ebé
inspira no habrani povu tomak atu tanen ita-nia kauza nasionál mak determina
ita-nia destinu, nu’ udar povu. Ohin ita ukun an ona, no ita ita tenke fó honra
ba sira-nia mehi, sira-nia barani, sira-nia hahalok pasiente no persistente.
Hosi grupu pioneiru ba ita-nia nasionalismu, maioria mate ona. Ita iha de’ it
ona maun rua: Dr Mari Alkatiri no Dr José Ramos Horta. Hanesan mos horiuluk,
sira na’in rua sei fó-an nafatin ba ita-nia kauza nasionál ne’e.
Maluk rihun ba rihun, feto no
mane, mate iha momentu istóriku oin-oin ba ita-nia kauza nasionál ne’e, hosi
1975 to’ o 1999. Ita haloot ona restus mortais saudozu sira-nian, iha semitériu
eróis nian. Restus Mortais balun foti ona maibé seidauk identifika no hein hela
prosesu. Maibé ita sei la hetan restus mortais hotu-hotu. Ita sei la hetan sira
ne’ebé isin soe tomak ba tasi-laran no iha rai fuik laran. Ita sei la hetan
sira ne’ebé udan haklekar ona sira-nia ruin iha foho ka rai tetuk. Sira ne’ebé
fó sira-nia vida ba rai ida ne’e halo sakrifísiu boot liu sarifísiu hotu-hotu.
Ita sira ne’ebé ohinloron loron goza independénsia ida ne’e, labele haluha
sira-nia sakrifísiu. Estadu Timor-Leste labele haluha ita-nia eróis. Ohin ita
hotu haklean ita-nia hanoin atu haree oinsá ita dignifika sira ne’ebé mate ona
no oinsá ita haree veteranus no kombatentes ne’ebé sei moris hela.
Atu fó-hanoin beibeik sira-ne’ebé
sakrifíka sira-nia vida, mak Estadu Timor-Leste deside hili 31 Dezembru nu’
udar loron eróis hotu-hotu nian. Tambasá Estadu hili loron 31 Dezembru nu’ udar
loron atu fó onra no omenajen ba ita-nia eróis hotu-hotu? Estadu konsagra 31
Dezembru ho razaun espesiál ida. Saudozu Prezidente Nicolau dos Reis Lobato
hetan tiru mo mate ho kilat iha liman, iha Mindelo, entre Maubisse, Turiscai no
Manufahi, iha loron 31 Dezembru 1978. Saudozu Nicolau simboliza eróis sira hotu
ne’ebé sakrifika sira-nia vida ba ita-nia kauza nasionál: hamriik nu’udar povu
ho identidade rasik, hamriik nu’udar nasaun independente no soberana. Bainhira
nia mate, saudozu Nicolau Lobato kaer kargu nu’udar Presidente FRETILIN,
Presidente RDTL no Comandante-em-Chefe das FALINTIL. Lei ne’ebé konsagra 31
Dezembru nu’udar loron eróis nian, aprova hosi Parlamentu Nasional, promulga
hosi Presidente Repúblika Taur Matan Ruak no publika iha Jornal Repúblika, iha
Novembro 2016.
Maluk no belun sira,
Lista eróis nian iha rohan-laek.
Barak ita hatene de’ it mak naran. Ita la hatene sira-nia istória. Ha’ u
aproveita loron ohin atu ko’alia oituan kona-ba saudozu Nicolau Lobato.
Ha’u ko’alia uluk kona-ba ba
ninia legadu boot: prinsípius no valores ne’ebé nia husik hela ba ita
hotu.
Ita hotu hatene katak krize aat
liu, iha sosiedade ne’ebé de’it, mak krize morál, krize prinsípius no valores.
Nune’ e importante tebes kaer metin prinsípius no valores sira ne’ ebé
dignifika ita nu’ udar ema. Família mak responsável dahuluk ba hakiak babeibeik
valores ne’ebé ita presiza hametin atu ita-nia sosiedade bele la’o ba oin ho
susesu. Alein de família, eskola no instituisaun seluk hanesan Igreja sira no
ita-nia líder sira hala’o mós responsabilidade eduka ita, atu moris ho prinsípius
no valores.
Saudozu Nicolau Lobato, oan mane
boot liu, hosi saudozu mestre katekista Narciso Manuel Lobato no saudoza
Felismina Alves Lobato, ho alin sanulu resin rua, moris no boot iha uma-kain
ida ne’ebé metin tebetebes ho prinsípius no valores kristauns.
Valores no prinsípius ne’ebé
saudozu Nicolau simu hosi família habelar liután bainhira nia halo estudus
primárius iha Koléjiu Katóliku Nuno Alves Pereira no ikus mai, iha Semináriu
Menor Nossa Senhora de Fátima, iha Dare.
Iha Semináriu mak saudozu Nicolau
hetan esperiénsia dahuluk nu’ udar líder bainhira Reitor Semináriu haruka
lidera seminarista sira durante tinan tolu tuituir malu.
Saudozu Nicolau tanen aas ninia
krensa katólika durante ninia vida tomak. Krensa ne’e mak kuda iha nia, valor
perdaun nian no lori nia perdoa ema ida ne’ebé oho nia alin rasik, Domingos
Lobato, iha 1975. Nia la husik mós ema seluk halo justisa rasik, tuir ida-idak
ninia hakarak. Tamba situasaun, iha tempu ne’ebá, la permite hala’o justisa
tuir lei, Nicolau hili fó perdaun ba ema ne’ebé hakotu ninia alin nia vida.
Hahalok ida ne’e bele sai referénsia di ‘ak ida oinsá kuda valór perdaun iha
sirkunstánsia espesiál ruma.
Maluk no belun sira,
Molok golpe estadu hatún governu
faxista iha 25 Abril 1974 no molok Portugal loke prosesu deskolonizasaun iha
Afrika no Timor-Leste, timoroan balun hatene tiha ona katak povu sira hosi
Mocambique, Angola no Guiné Bissau, hala’ o hela luta armada hasoru
kolonialismu portugés.
Enkuantu hala’ o hela servisu
militár obrigatóriu, hosi tinan 1966 to’ o 1968, saudozu Nicolau Lobato koñese
Primeiru Sargentu mosambikanu, sr Timane, no liuhosi belun ne’e, mak saudozu
Nicolau rona kona-ba FRELIMO, Frente Libertação de Moçambique.
Bainhira hala’o servisu dadaun
iha Missão Agronómica de Timor, iha 1969, saudozu Nicolau koñese rejente
agríkola ida hosi Cabo Verde, sr Marcelino, ne’ebé hato’o informasaun kona-ba
luta libertasaun nasionál iha Guiné Bissau no Cabo Verde, lidera hosi PAIGC,
Partido Africano da Independência da Guiné e Cabo Verde.
Hosi kontaktu sira ne’e no no
hosi livru kona-ba lutas libertasaun iha África no mós informasaun hosi Dr Mari
Alkatiri no maluk sira seluk, mak saudozu Nicolau hamanas liután ninia mehi atu
ita UKUN RASIK AN.
Maluk no belun sira,
Iha Maiu 1975 saudozu Nicolau
Lobato liuhosi Portugal no tesi lia ho estudantes timoroan sira no mós ho
estudantes hosi kolónias portuguesas, partidus polítikus Portugal nian no
jornalista sira.
Sausozu Nicolau bá to’ o
Moçambique ko’alia ho líderes FRELIMO nian, inklui saudozu Prezidente Samora
Machel. Iha sira nia enkontru ne’e mak mosu idéia atu ita harii representasaun
ida, iha Moçambique, atu hala’ o kampanha internasionál ba UKUN RASIK-AN ho
apoiu tomak hosi FRELIMO.
Saudozu Nicolau Lobato, nu’ udar
líder vizionáriu ida, hatene tiha ona katak frente interna mesak de’ it la to’
o atu garante susesu ba ita-nia luta. Ita presiza doko mós iha liur, fó hatene
ita-nia mehi UKUN RASIK AN ba komunidade internasionál no konvense sira katak
ita bele kaer rasik ita-nia destinu.
Tamba nesesidade luta obriga buka
apoiu hosi komunidade internasionál, saudozu Nicolau Lobato deside haruka sai
Dr Mari Alkatiri, Dr José Ramos Horta no Sr Rogério Lobato, iha 4 Dezembru 1975
. Ida-idak husik Timor-Leste ho ninia knaar rasik!
Solidariedade internasionál
foufoun kedas hosi Moçambique, Angola, Guiné Bissau, Cabo Verde, Sao Tomé
Principe no Portugal, país sira ne’ebé ohin halo parte CPLP, no mós hosi país
no komunidade sira seluk iha Asia, Europa, Amérika no Oceania mak la husik
hasai Timor-Leste hosi ajenda Nações Unidas to’o ita hetan direitu ba
auto-determinasaun no independénsia.
Ohinloron ita bele dehan katak
ita-nia vitória totál mai hosi susesu luta iha rai laran no iha rai liur.
Susesu ne’e mai hosi vizaun luta
lider sira hosi jerasaun 75 nian. Vizaun ne’e hatutan ba líder sira seluk
ne’ebé fó-an tomak mós ba ita-nia luta libertasaun nasional. Merese mós mensaun
espesiál, ho ida-idak nia méritu, irmaun Kay Rala Xanana Gusmão, irmaun saudozu
Nino Konis Santana, irmaun Ma’Huno Bulerek Karataiano, irma saudoza Rosa Muki
Bonaparte, Dulce Cruz Wewe, Maria Ceu Perreira Bi-lear, irmaun saudozu Hodu
Rankadalak, irmaun Taur Matan Ruak no irmaun saudozu Fernando Lasama.
Maluk doben sira,
Importante ko’alia ohin kona-ba
oan-kiak sira ho otas kiik. Labarik sira ne’ebé lakon aman ka/no inan hetan
risku sai labarik vulnerável.
José Lobato, oan mesak husi
saudozu Prezidente Nicolau Lobato, ne’ebé hamutuk ohin ho ita, la koñese inan
no aman rasik. Inan hetan tiru no mate iha ponte kais iha Dezembru 1975 no aman
hetan tiru no mate iha Dezembru 1978. Maibé José Lobato sorte liu oan kiak sira
seluk tamba hetan fali domin hanesan inan-aman nian, hosi tia Olímpia Barreto
no tio José Gonçalves. Oan-kiak
barak seluk hetan domin iha uma-kain seluk maibé barak moris ho halerik. Balun
ema lori lakon tiha. Estadu Timor-Leste iha obrigasaun atu tau matan ba oan
kiak sira, nu’udar grupu vulnerável.
Importante mós ba Estadu tau
matan ba veteranus no kombatentes, liuliu ba sira ne’ebé moras, idade aas ona
no iha defisiénsia oinsá de’it.
Ha’ u husu Parlamentu Nasional
atu haree fila fali Lei ne’ebé fó-dalan atu harii ho diak Konsellu Nasionál
Veteranus no Kombatentes Libertasaun Nasionál.
Bainhira Konsellu ne’e harii ona,
ita bele hala’ o servisu barak liután, inklui hamoris fali ain-fatin
guerrilleiru sira-nian, fatin sira ne’ ebé hariku ita-nia istória libertasaun
nasionál. Ha‘u kontenete rona katak Centro Nacional CHEGA halo ona mapeamentu
istóriku kona-ba subar- fatin rezisténsia nian, iha Dili laran no Arquivo e
Museu da Resistencia Timorense halo rehabilitasaun ba abrigu protagonista luta
libertasaun nasionál.
Inisiativa hanesan ne’e di’ak
tebes atu hatama iha roteiru istóriku-kultural atu haburas turismu istóriku iha
ita nia rain no harii empregu, liuliu ba veteranus no kombatentes, faluk no
oan-kiak sira.
Ha ‘u ramata ha‘u-nia diskursu ho
lia fuan hosi saudozu Prezidente Nicolau Lobato:
“Nós somos um país pequeno e
fraco. Os nossos inimigos são muitos e poderosos. Entretanto, sós sabemos que
podemos e devemos vencer!”
“Ita-nia país kiik no fraku. Ita
iha inimigu barak ho kbiit maka’as. Maibé, ita hatene katak ita bele no ita
tenke manán”.
Ha’ u husik hela reflexaun ba
maluk sira lori ba uma: Saída loos no tambasá mak Nicolau Lobato husik buat
hotu-hotu…. empregu, família, moris di’ak, no sakrifika vida rasik?
Sá legadu mak eróis sira husik
hela mai ita hotu no ba ita ida-idak?
Ho reflekasaun ida ne’e mak ita
sei tama ba tinan foun ho hakarak ida de’ it: atu lori moris di’ak ba ita- nia
povu tomak!
Obrigado
Sem comentários:
Enviar um comentário