MANUFAHI, (TATOLI) - Autoridade
lokál no sosiedade sivíl sira hosi Munisípiu Manufahi levanta katak suku
hamutuk 13 iha Munisípiu Manufahi to’o ohin loron seidauk asesu ba iha enérjia
eletrisidade.
Kestaun ne’e hato’o hosi
Administrador Postu Administrativu Same Vila, Armando Assunção da Costa no
reprezentante sosiedade sivíl (ONG) iha Same, Isaac da Silva Sarmento
liuhusi konsultasaun Programa Sétimu Governu Konstitusionál ne’ebé hala’o hosi
Primeiru Ministru, Marí Alkatiri no membru Governu sira iha edifísiu
Administrasaun Munisípiu Manufahi, Suku Holarua, Postu Administrativu Same
Vila, foin lalais ne’e.
Suku sira ne’ebé seidauk asesu ba
eletrisidade maka hanesan aldeia balun iha Suku Holarua, aldeia balun iha suku
Suku Rotuto, Daisua, Suku Fahinehan, Suku Bubususu, Suku Tutuluro, Suku Aituha
iha Postu Administrativu Alas, Suku Clacuc iha Postu Administrativu Fatuberlihu
inklui suku hitu iha Postu Administrativu Turiscai no sel-seluk tan.
Aleinde eletrisidade, suku 11 iha
Manufahi mós seidauk asesu ba eletrisidade maka hanesan Suku Rotuto,
Daisua, Tutuluro, Aldeia Biterai (Suku Clacuc), suku balun iha Turiscai no sira
seluk tan.
“Ami rekomenda ba Governu atu fó
atensaun ba asuntu ne’e, tanba komunidade ne’ebé infrenta problema refere
seidauk sente dezenvolvimentu iha Nasaun ida ne’e,” reprezentante sosiedade
sivíl, Isaac da Silva Sarmento informa.
Iha biban ne’e, Primeiru Ministru,
Marí Alkatiri responde katak preokupasaun hirak ne’e pertenente. Tanba ne’e,
nia dehan, iha tempu badak nia laran nia sei autoriza Ministériu Obras Públikas
no Eletrisidade atu ba tún direta buka solusaun ba komunidade ne’ebé seidauk
asesu ba eletrisidade, Estrada no bee-moos.
“Problema hanesan ne’e mós
akontese iha munisípiu seluk no Governu fó solusaun dadauk ona. La kle’ur tan
Ministru Adjuntu Primeiru Ministru ba asuntu Governasaun ne’ebé kaer mós asuntu
eletrisidade, José Reis sei to’o mai Manufahi atu halo identifikasaun ba suku
sira ne’ebé seidauk asesu ba eletrisidade,” Marí afirma.
Jornalista: Xisto Freitas | Editór
: Manuel Pinto
Imajen: Komunidade Manufahi simu
Primeiru Ministru, Marí Alkatiri ho membru Governu sira, kinta (8/3). Imajen
Ajénsia Tatoli/Xisto Freitas).
Sem comentários:
Enviar um comentário