domingo, 27 de maio de 2018

Kada tinan, Bali sei haruka turista 400.00 mai TL


Ministru Turizmu (MT), Manuel Vong, informa, hahú husi tinan 2019, Indonesia liu husi provinsia Bali sei apoiu kanaliza turista mai Timor-Leste (TL) mais ou menus ho total 400.000 turista kada tinan.

“Ami informa ba PR katak governador Bali-Indonesia (Made Mangku Pastika-red) hamutuk ho ninia estrutura tomak fó apoiu ba ita atu bele kanaliza por volta de 400.000 turistas por ano, komesa husi 2019 atu dezenvolve pakote viazen konjuntus, ho nune’e maka ita prepara an ba hodi sai uma nain diak hodi simu turista sira iha futuru,” MT ba jornalista sira hafoin remata enkontru ho Prezidente Repúblika (PR), Francisco Guterres ‘Lú Olo’, iha Palasiu Prezidensial, Bairo Píte, Díli, Sesta (25-05-2018) hodi informa servisu ne’ebé MT halo durante fulan hitu (7) nia laran.

Nia esplika, tarjetu MT ninian iha 2030 bele alkansa duni buat hirak ne’ebé estabele iha planu estrateziku 2011-2030 katak mínimu tenki iha 200.000 to’o 500.000 turistas kada tinan.

“Ha’u fiar katak Governu foun mai bele fó kontinuasaun ida ne’e no ami nain rua (2) Vise MT (Rui Menezes da Costa-red) ho MT tomak, ami agradese ba fiar tomak ne’ebé maka fó mai ami nain rua (2),” dehan Manuel Vong.

Nia akresenta, durante fulan hitu (7) nia laran MT halo buat lubuk ida, prinsipalmente iha area reforma institusional, hametin regulamentasaun ba garante dezenvolvimentu turizmu sustentavel, ho intensaun atu institusionaliza duni turizmu to’o ba iha nivel rurais, tanba TL iha zona turistíka tolu (3) hanesan zona oriental, sentral ho osidental.

“Iha zona tolu (3) ne’e ita sei estabelese kooperativa turizmu komunitariu no klibur juventude emprendedor turistíku, a nivel nasional ita sei estabelese kona-bá autoridade nasional turizmu ne’ebé maka sei fasilita prosesu dezenvolvimentu industria turizmu iha teritoriu tomak. Ita sei kria mós fundu turizmu ne’ebé maka inisia tiha ona, presiza fó kontinuasaun no iha zona turistíka, ita sei hari’i sentru apoiu dezenvolvimentu integrado abragente hanaran Sentru Apoiu Dezenvolvimentu Integradu Abrajente (SADIA) iha zona turistíka sira,” relata MT VII Governu ne’e.

Manuel Vong haktuir, liu husi buat hirak ne’e maka bele fó asistensia ba komunidade sira iha kooperativa turizmu báziku komunitariu no bele lori inisiativa turizmu hodi benefisia ba komunidade sira, liu-liu iha nivel industria turistíka iha nivel nasional ninian.

Entretantu durante fulan hitu (7) ne’e MT konsege atrai ona investidor entranjeiru ne’ebé investe direta ba Estadu mais ou menus 104.000 (Cento e quarto milhões dolar-red). ves

GMN TV | Grupo Média Nacional

Imajen: Prezidente Repúblika (PR), Francisco Guterres ‘Lú Olo’ ho Prezidente Ministru Turizmu, Manuel Vong, akompmanha husi nia Vice, Rui menezes,  hasai foto hamutuk hafoin enkontru, iha Palasiu Prezidensial Nicolau Lobato, Sesta-feira (25/05/2018). Foto Media PR.

Sem comentários: