domingo, 27 de maio de 2018

Tempu badak AMP sei anunsia kompozisaun meja PN

PARTILHAR

Koligasaun partidaria Aliansa Mudansa ba Progresu (AMP), sei anunsia kompozisaun meja Parlamentu Nasional (PN) V lejislatura iha tempu badak, bainhira Tribunal Rekursu válida ona rezultadu final eleisaun antesipada nian.

Lideransa AMP, Arão Noe, informa, prosesu hotu kona ba formasaun VIII Governu sei la’o, hafoin Tribunal Rekursu fó ona rezultadu final eleisaun.

“Se Tribunal Rekursu anunsia ona, ami sei anunsia uluk mak kompozisaun meja ba Parlamentu Nasional, ami sei la ko’alia uluk estrutura VIII Governu. Kompozisaun meja Parlamentu kompletu ona mak foin ko’alia kona ba, se mak atu ba Primeiru Ministru, hotu tiha mak foin ko’alia kona ba membru Governu, hotu tiha mak foin ita ko’alia fali kona ba aprezentasaun programa, lei orgánika Governu  inklui Orsamentu Jeral Estadu 2018,”informa Arão Noe ba jornalista sira iha PN, Kinta (23/05).

Maibé lideransa AMP ne’e dehan, sira lakohi públika uluk preparasaun sira ne’e ba públiku, bainhira Tribunal Rekursu seidauk válida rezultadu eleisaun.

“Estrutura VIII Governu, hanesan ami dehan katak, bainhira kuandu rezultadu final iha ona, preparasaun sira ne’e iha hotu ona hanesan, prepara programa, lei orgánika VIII Governu, estrutura Governu no prepara Orsamentu Jeral Estadu 2018,” katak Arão Noe.

Nia hatutan, haree ba situasaun agora atu monu ona ba krize finanseiru, tanba osan duo-désimu la to’o atu selu funsionáriu sira iha fulan Juñu nia laran ne’e, entaun bainhira Tribunal Rekursu anunsia rezultadu final eleisaun, AMP sei aselera prosesu sira ne’e hotu.

Hatan kona ba, Sosiedade Sivil rekomenda atu estrutura VIII Governu tenki ki’ik, Arão Noe, hateten, seidauk tempu atu halo kiik estrutura Governu, tanba komesa husi primeiru Governu mai to’o agora, buat hotu sentralizadu iha nasional.

“Se ita hamenus membru Governu, sei perturba funsionamentu servisu Estadu nian. Tanba ne’e mak polítika AMP nian katak, estrutura VIII Governu ne’e tenki bo’ot nafatin atu bele asegura funsionamentu Estadu bele la’o diak,” katak Arão Noe.

Nia esplika, estrutura Governu bele hamenus, bainhira desentralizasaun ne’e la’o los ona. Maibé tuir Arão Noe, iha VIII Governu ne’e, sei realiza ona deskonsentrasaun hodi poder sentral ne’e, deskonsentra iha Munisípiu sira. cos

GMN TV | Grupo Média Nacional
PARTILHAR

Author: verified_user

Publicação luso-timorense sem fins lucrativos

0 comentários: