DILI, (TATOLI) – Embaixadór
Repúblika Árabe Saarauí Demokrátika, Mohamed Slama Badi, mai hasoru malu ho
Primeiru-Ministru (PM), Marí Alkatiri hodi hato’o mensajen husi governu nasaun
ne’e.
“Ohin hanesan onra boot ida bele
hasoru malu ho Primeiru-Ministru, hodi hato’o no espresa mensajen husi governu
Saarauí, no lá haluha hato’o mós gratidaun ba relasaun Saarauí no Timor-Leste”,
tenik Embaixadór ne’e iha Palásiu Governu, hafoin hasoru malu ho Xefe Governu,
ohin.
Hodi dehan, relasaun entre nasaun
rua ne’e hanesan relasaun istóriku husi rezisténsia tinan 1997 no relasaun ne’e
besik liu tan bainhira Repúblika Saarauí loke embaixada iha Dili.
Alende ne’e nia haktuir, biban
ne’e aproveita mós halo diskusaun ho PM konaba relasaun bilaterál entre nasaun
rua.
Antes ne’e liuhosi reuniaun
Konsellu-Ministru, Governu Timor-Leste aprova atribuisaun donativu ba
reprezentasaun permanente ba nasaun kolonializasaun husi España ne’e, tuir
proposta husi Ministériu Negósiu Estranjeiru no Kooperasaun.
Donativo ne’e ho hanoin ida hodi
hametin lasu istóriku ne’ebé iha tiha entre nasaun rua ne’e, iha luta ba
autodeterminasaun, prinsípiu solidariedade konaba luta libertasaun nasionál povu
nian no iha direitu ba autodeterminasaun no independénsia, ne’ebé hatuur ona
iha Konstituisaun Repúblika.
Hahú tinan 2011, Timor-Leste
kontribui ona ba funsionamentu reprezentasaun permanente embaxada Repúblika
Saarauí iha Díli liuhosi subsídiu anuál ba atividade nasaun ne’e iha
Timor-Leste no iha rejiaun.
Jornalista: Julia Chatarina | Editór:
Manuel Pinto
Sem comentários:
Enviar um comentário