quarta-feira, 6 de junho de 2018

IOM: Ró mout iha largu Tunízia nian hanesan todan liu iha tinan ne'e ho ema na'in 112 mate

PARTILHAR

Organizasaun Internasional ba Migrasaun sira kalkula, iha loron-tersa ne'e, katak ema na'in 112 maka mate iha ró mout iha loron-sábadu kalan liubá iha kosta-súl Tunízia nian, hodi konsidera hanesan insidente todan liu dezde hahú tinan ne'e.

Tuir porta-vós hosi ajénsia ONU nian ba migrasaun sira (IOM), Leonard Doyle, konfirma ona ema na'in 60 mate no na'in 52 seluk lakon iha tasi Mediteráneu no karik sira mós mate.

Ema na'in 68 konsege moris iha akontesimentu ró mout ne'ebé iha kapasidade ba de'it ema na'in 70, maibé iha momentu akontesimentu iha ema barak liu duké kapasidade, haktuir hosi sasin sira.

Ne'e hanesan naufrájiu ne'ebé aat liu dezde ró rua ne'ebé mout, iha fulan-Janeiru no fulan-Fevereiru, iha besik tasi-ibun Líbia nian, halo ema na'in 100 mate ka lakon iha ró ida-idak ne'e.

Ema tunizinu sira tenta beibeik atravesa tasi Mediteráneu ho diresaun ba Itália, hodi buka tama iha Europa no hodi buka moris ida ho kondisaun di'ak liu.

Tuir organizasaun oioin ne'ebé la'ós governu nian (ONG sira), situasaun ne'e hatudu joven tunizinu sira nia laran la haksolok, barak liu tanba laiha serbisu.

Iha fulan-Marsu, ema na'in 120, maioria hosi Tunízia, ne'ebé maka hakarak to'o, tuir dalan klandestinu, iha tasi-ibun italianu sira hetan salva hosi Mariña tunizina.

Antes trajédia, Komisariadu Aas hosi ONU ba Refujiadu sira (UNHCR) kalkula katak ema na'in 646 mate ona iha tinan ne'e bainhira tenta atravesa tasi Mediteráneu no to'o iha Europa.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: