quarta-feira, 6 de junho de 2018

Orsida, Aviaun Funu Amérika Sei Tuun iha Timor-Leste

PARTILHAR

DÍLI, (TATOLI) - Ministru Negósiu Estranjeiru no Kooperasaun, Aurélio Guterres informa katak aviaun Funu Amérika nian rua sei tuun iha aeroportu internasionál, Nicolau Lobato, Comoro-Díli, maizmenus tuku 13h00 ba leten hodi hala’o servisu umanitária iha Timor-Leste (TL), iha ámbitu kooperasaun entre TL ho Estadu Unidu Amérika (EUA).

“Orsida meudia, lorokra’ik aviaun rua sei halo aterajen iha Timor-Leste, liliu iha Díli atu dezloka ba Suai hala’o servisu umanitáriu, ne’ebé forsa amerikanu sira mak hala’o, fó apoiu, atendimentu ba ita-nia populasaun sira ne’ebé mak presiza,” informa Ministru Aurélio, ba jornalista sira iha Ministériu Negósiu Estranjeiru no Kooperasaun (MNEK), Praia dos Coqueiros-Díli, ohin dader ne’e.

“Liliu iha área saúde ninian nomós medisina dentária, liliu ba família ne’ebé iha zona rurais, alende ida ne’e atu hala’o ezersísiu hamutuk ho ita-nia forsa defeza, liliu atu fó formasaun, kapasitasaun enjeñária ita-nia forsa defeza ninian iha Timor-Leste ialém mós iha ligasaun ho seguransa,” esklarese governante ne’e.

Ministru Aurélio Guterres informa tan katak kooperasaun ne’e espesifikamente ho Ministériu Defeza ho Seguransa no husi Ministériu Negósiu Estranjeiru no Kooperasaun fó apoiu tomak, liliu kestaun birokrátiku sira ne’ebé presiza fó apoiu ba atividade ne’e atu la’o di’ak liu bainhira sira implementa iha Timor-Leste husi dia 6-20 juñu.

“Ne’e mak objetivu husi chegada (to’o) kontijente enjeñária husi Estadu Unidu Amérika, oras-oras tan sira sei tuun iha aeroporto Díli,” informa ministru ne’e.

Ministru Negósiu Estranjeiru no Kooperasaun, Aurélio Guterres mós informa liutan katak kontijente enjeñária Amérika ne’e sei to’o iha Díli ohin, hafoin preparasaun lojistíka loos hotu tiha, sira sei dezloka ba Suai, pois sira sei hamutuk ho ita-nia Ministériu Defeza no Seguransa (MDS) nomós ita-nia forsa defeza, F-FDTL (Falintil-Forsa Defeza Timor-Leste) koordena.

“Inklui koordena mós ho ita-nia Ministériu Saúde atu halo atendimentu ba ita-nia komunidade iha Suai, liliu saúde dentária, saúde komunitária alende reforsa tan formasaun téknika ba komponente enjeñária ita-nia forsa defeza,” esplika ministru Aurélio Guterres.

Ministru informa tan katak alende dezlokasaun komponente forsa amerikanu sira ne’e ba iha Suai, ba fatin seluk, MNEK seidauk hetan informasaun.

“Aviaun ne’e militár nian. Aviaun ne’e, hanesan Hercules,” konklui Ministru Aurélio ho refere ba tipu aviaun funu rua husi forsa Amérika, ne’ebé orsida sei tuun iha Díli ne’e.

Antes ne’e, aviaun forsa Estadu Unidu Amérika (EUA) ho Boeing C17-Globe Master III, mós tuun ona iha Aeroportu Díli, hodi hala’o atividade umanitária. Misaun kooperasaun, liliu ba umanitária ne’e hahú ona iha 2002, entre governu no estadu TL no EUA.

Jornalista: Rafy Belo | Editór: Manuel Pinto

Imajen: Forsa EUA bainhira to’o iha TL. Foto Media embaixada EUA
PARTILHAR

Author: verified_user

Publicação luso-timorense sem fins lucrativos

0 comentários: