quarta-feira, 6 de junho de 2018

ONU husu ba EUA "hapara lalais" separasaun hosi labarik no aman-inan iha fronteira

PARTILHAR

ONU husu ona, iha loron-tersa ne'e, ba administrasaun norte-amerikanu hodi halo "suspensaun lalais" ba prátika hodi haketak labarik sira hosi aman-inan sira ne'ebé maka kaer bainhira atravesa ho dalan ilegal fronteira entre Estadus Unidus ho Méxiku.

Tuir polítika hosi administrasaun prezidente Donald Trump nian ba "toleránsia zero" hasoru imigrasaun klandestinu, ema sira ne'ebé kaer hetan bainhira tama tuir dalan ilegal iha Estadus Unidus iha fronteira súl tenki hetan detensaun no hasai tiha sira nia oan.

"Estadus Unidus tenki hapara lalais prátika ne'e", afirma hosi porta-vós ida hosi Komisariadu Aas ONU nian ba Direitu Ema nian, Ravina Shamdasani, ba imprensa.

"Nunka kaer labarik sira tanba razaun sira relasionadu ho nia estatutu migratóriu ka tanba aman-inan sira nian. Detensaun nunka hanesan interese di'ak ba labarik no konstitui nafatin hanesan violasaun ida ba labarik nia direitu", nia hatutan.

Polítika "toleránsia zero" konstitui interferénsia ida "arbitráriu ho ilegal" iha moris familiar, konsidera hosi responsável.

"Estadus Unidus hanesan nasaun úniku iha mundu ne'ebé la ratifika Konvensaun Direitu Labarik nian, maibé ne'e la halo sira livre hodi tuir no kumpri direitu sira hosi labarik sira nian", nia afirma.

Tuir Komisariadu Aas, labarik atus resin hosi nasaun sira sentru-amerikanu nian kaer iha fronteira súl hosi Estadus Unidus dezde fulan-Outubru, inklui kosok-oan ida ho tinan ida.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: