DILI, (TATOLI) - Prokuradór Jerál
Repúblika, José da Costa Ximenes hateten hahú hosi períodu kampaña to’o iha
loron eleisaun antesipada, 12 Maiu 2018, Ministériu Públiku (MP) rejista kazu
ho tipu krime eleitorál hamutuk 14 prosesu.
Entre 14 prosesu ne’e, nia
esplika, kazu sanulu resin ida (11) akontese iha Dili, kazu rua (2) akontese
iha Munisípiu Baukau no kazu ida (1) akontese iha Oe-Cusse.
“Maski nune’e, durante faze
kampaña eleitorál akontese mós kazu balun, pur-ezemplu, ofensa no estragu nó
mós akontese kazu pekulatu purvolta lima hanesan ne’e maka rejista iha MP,
maibé hirak ne’e laiha ligasaun ho krime eleitorál,” Ximenes hato’o informasaun
ne’e ba jornalista sira iha Palásiu Prezidente Nicolau Lobato, Bairru Pité,
Dili, kuarta ne’e, hafoin relata krime eleitorál refere ba Prezidente
Repúblika, Francisco Guterres Lú Olo.
Nia esplika katak oras ne’e
Ministériu Públiku hala’o hela investigasaun ba krime eleitorál hirak ne’e,
maibé nia rejeita fó sai tipu krime eleitorál ba públiku tanba tékniku liu.
“Iha hela faze investigasaun, tan
ne’e ami labele temi tipu kazu ba ita-boot sira (jornalista-red). Hafoin
investigasaun ramata, ami sei fó sai ba públiku,” Prokuradór Jerál afirma.
Jornalista: Xisto Freitas | Editór:
Manuel Pinto
Imajen: Prokuradór Jerál
Repúblika (PJR), José da Costa Ximenes.
Sem comentários:
Enviar um comentário