DILI, (TATOLI) – Universidade
Nasionál Timor Lorosa’e (UNTL) liuhusi nia kooperasaun ho universidade
portugeza sira iha 2019 sei loke kursu foun ne’ebé konsellu jerál aprova ona
nia dosier iha área mestradu iha portugés tuir kontestu Timor-Leste,
mestradu iha matemátika ba profesór sira nomós lisensiatura formasaun
profesór pré-eskolár ne’ebé sei harii iha Fakuldade Edukasaun, Arte no
Umanidade.
Reitór UNTL, Francisco Miguel
Martins, hatete kolaborasaun ida ne’e sei halo hamutuk ho Universidade Portu,
Universidade do Minho, Évora, Aveiro iha Portugál nomós integradu ho profesór
lokál sira para iha integrasaun dezenvolvimentu institusionál no departamentu.
“Ida mós iha área balun ne’ebé
ita atu institusionaliza iha tinan oin mai kursu foun iha área mestradu iha
direito do mar e segurança marítima, mas seidauk aprezenta dosier sira ne’e
entaun ita rezerva hela, kuandu iha eventu formál ona ita bele implementa iha
ita-nia anu akadémiku mai. Daudaun ne’e Universidade do Portu no Coimbra
konstroe hela dosier mestrado em direito do mar e segurança marítima”,
Martins hatete ohin, iha Sentru Konvensaun Dili hafoin graduasaun UNTL ba
da-XIX.
Nia hatutan ida ne’e importante
tanba Timor-Leste hanesan illa, tasi maka hale’u no seguransa tasi nian tenke
halo maski iha ona lisensiatura iha fakuldade agrikultura, departamentu peska
no siénsia mariña tanba haree katak rikusoin tasi-laran ne’e boot liu karik iha
terrestre.
“Tanba ne’e mak ita loke área
foun sira ne’e tuir ita-nia nesesidade reál país nian atu eleva kualidade no
bele mós ita sustenta ita-nia an ho ita-nia situasaun reál ne’e”.
Aleinde ne’e sei loke mós
lisensiatura iha istória no jeografia Timor-Leste iha fakuldade filozofia no
siénsia umana.
“Longu prazu tinan oin mai tan
ita atu loke tan medisina dentária, maibé ida ne’e sei programa hela bainhira
mak ita atu implementa, haree lai kondisaun favoravel tanba medisina dentária
kustu ne’e la’ós uitoan. Entaun fazeadamente ita dezenvolve tuir nesesidade
pais nian atu fó formasaun ema iha área ida ne’e atu serbí ba ita-nia
komunidade no país”.
Jornalista: Maria Auxiliadora | Editora:
Rita Almeida
Imajen: Reitór Universidade
Nasionál Timor Lorosa’e (UNTL), Francisco Miguel Martins. Foto/ Mídia
Komunikasaun UNTL.
Sem comentários:
Enviar um comentário