DILI, (TATOLI) - Embaixadór Nova
Zelándia ba Timor-Leste, horisehik (4/7), husu ona deskulpa ba Xefe Estadu
Maiór FALINTIL-Forsa Defeza Timor-Leste (F-FDTL), Majór Jenerál Lere Anan
Timur, relasiona ho koronél ida hosi Nova Zelándia ho naran Kerry Mckee ne’ebé
espekula katak sei akontese golpe iha Timor.
Embaixadór deklara katak
espekulasaun ne’e pesoál ida nian, la’ós reprezenta Estadu Nova Zelándia no
Embaixada rasik demite ona pesoál refere hosi ninia misaun iha Timor.
“Situasaun ida ne’e horisehik
Embaixadór Nova Zelándia ho nia adidu mai husu deskulpa ona ba ami. Ba ha’u, la
tau kestaun ba asuntu ida ne’e. Maibé, opiniaun públika ida ne’e maka
sofistikadu liu, katak, ema iha mundu tomak rona hotu ona,” Lere hato’o kestaun
ne’e ba jornalista sira iha Palásiu Prezidente Nicolau Lobato, Bairru Pité,
Dili, kuarta ne’e.
Tuir nia katak espekulasaun
refere afeta ba ekonomia rai laran tanba ofisiál refere to’o pontu ida hateten
golpe, tanba nia (Lere) ho Primeiru-Ministru, Taur Matan Ruak no Brigadeiru
Jenerál, Filomeno Paixão, haree malu ladi’ak.
“Liafuan golpe ne’e bele afeta
ekonómikamente ba ita nia rai, tanba investor internasionál sira ta’uk mai
investe iha Timor,” nia hatutan.
“Ami nunka haree malu ladi’ak
tanba ha’u laiha diverjénsia ideia ho atuál Primeiru-Ministru no Brigadeiru
Filomeno Paixão ne’ebé iha tempu besik sei simu tomada pose ba Ministru
Defeza,” nia esklarese.
Maski nune’e, Lere afirma,
problema ne’e la afeta ba kooperasaun bilaterál entre nasaun rua (Timor-Leste
no Nova Zelándia) iha área militár.
“Kestaun maka ita tenke respeita
malu. Saida maka Timor nian, ne’e Timor nian no saida maka nasaun seluk nian
ne’e nasaun seluk nian. Ita labele interrompe, labele deturba no labele
espekula situasaun rai laran,” eis Komandante Gerrilleiru ne’e reálsá.
Jornalista: Xisto Freitas | Editór:
Manuel Pinto
Imajen: Majór Jenerál Lere Anan
Timur
Sem comentários:
Enviar um comentário