Ekipa Task Force Komesa Konklui Esbosu Jestaun Sítiu Turístiku Ramelau

DILI, (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, haktuir ekipa task force komesa konklui ona esbosu ba jestaun sítiu turístiku Na’i-Feto Ramelau nian ne’ebé iha tempu badak sei aprezenta ba Bispu Dioseze Dili nomós membru Governu sira para hetan apresiasaun hodi aprova no implementa iha 7 outubru 2018 bainhira fatin ne’e hahú loke ba vizitante.

“Agora daudaun task force halo hela serbisu. Ekipa horisehik tun ba Ramelau para halo hela levantamentu dadus ne’ebé hetan apoiu mós husi USAID, tanba ita hatene katak agora osan duodésimu seidauk funsiona ho normál, ne’ebé ita iha parseiru dezenvolvimentu, entaun sira ajuda ita para halo levantamentu hamutuk”, Quintas afirma iha Sentru Konvensaun Dili, ohin.

Aleinde ne’e parseiru dezenvolvimentu Telkomcel mós apoia lixu fatin, tanba isu boot iha foho santu ne’e mak fo’er.

“Entaun ita halo jestaun ba lixu, ita presiza mós lixu fatin, ita-nia vizitante sira, liuliu ita-nia maluk sira ne’ebé halo vizita ba Na’i-Feto Ramelau bele haree katak fo’er ne’ebé ita iha tenke soe iha nia fatin, labele soe arbiru”.

Quintas haktuir akordu ne’ebé asina entre Governu no Dioseze Dili katak Na’i-Feto Ramelau sei loke hikas fali iha 7 outubru, entaun daudaun ne’e serbisu nafatin hamutuk ho parseiru dezenvolvimentu sira no Governu mós tenta nafatin para iha loron ne’ebé termina ne’e buat hotu la’o di’ak no loke ba públiku para halo vizitasaun ba fatin ne’e.

Diretór Jerál ne’e mós hatutan ho impase polítika ne’ebé akontese halo impedimentu, liuliu orsamentu ba ekipa task force ne’ebé hala’o nia knaar ba jestaun sítiu turistiku Na’i-Feto Ramelau, maibé ekipa ne’e iha kompromisu nafatin hodi halo serbisu.

“Ekipa sira tuun bá halo levantamentu dadus, mina mós laiha, komu ita iha parseiru dezenvolvimentu, liuliu USAID sira apoia transporte, prepara akomodasaun, ai-han ba ita, tanba sira iha kompromisu katak iha programa ida turizmu ba ema hotu ne’ebé millaun sia sei investe ba turizmu iha Timor-Leste, parese to’o tinan tolu ou lima”.

Entaun, nia dehan ekipa mós hola parte iha projetu Ramelau nian, tanba Ramelau sai sítiu turizmu relijiozu entaun presiza halo jestaun di’ak para fututu kontrola vizitante sira ne’e para labele soe fo’er arbiru no respeita fatin ne’e hanesan sagradu.

Aleinde ne’e sei iha mós programa ida para hasa’e konxiénsia, liuliu vizitante sira bainhira vizita iha responsabilidade morál, fo’er ne’ebé prodús lori fila ou soe iha nia fatin nomós respeita fatin ne’e. Bainhira timoroan rasik mak respeita ona maka estranjeiru sira bá mós respeita, tanba uma-na’in mak tenke fó ezemplu ba bainaka sira.

Jornalista: Maria Auxiliadora | Editora: Rita Almeida

Imajen: Santuáriu Ramelau. Foto/Google