Emprezáriu TL Kontinua Apoia Óscar Lima Lidera CCI-TL

DILI: Emprezáriu timoroan Timor-Leste sira ne’ebé tinan barak sai forsa ekonomia ba Timor-Leste, kontinua deklara apoia ba Diretór Kompañia MONTE VEADO, Óscar Lima, atu kontinua lidera Kámara Komersiu Indústria Timor-Leste (CCI-TL) ba períodu daruak 2018-2022.

Emprezáriu timoroan boot ne’ebé apoia Óscar mai husi kompañia hanesan Timor Plaza, Leader, Ai-Tula Fuel, Jonize/Nananiu, Montana Diak, Bobolait, Cladotia Fu no kompañia nasionál seluk ho asosiasaun emprezáriu 18 no estrutura CCI-TL munisípiu 13.

Ho apoia ne’e, Óscar fiar katak, ekipa susesu tomak ne’ebé kompostu husi emprezáriu boot hakarak kontribui hadi'a duni programa CCI-TL koopera ho governu no grupu kooperativa hotu iha Timor-Leste atu hadi'a ekonomia TL.

“Ha’u nia belun emprezáriu lubun boboot sira mesak forsa ekonomia Timor-Leste maka apoia ha’u sei manan, tanba ha’u la’ós mesak”, dehan nia, iha nia-rezidénsia, Fomentu-Dili, Sesta (24/8).

Nia hatutan, razaun fundamentu ne’ebé dudu nia hakarak kontinua segundu mandatu, hodi hadi'a di’ak liután programa CCI-TL ne’ebé seidauk konsege ezekuta.

Óscar lembra, iha primeiru períodu CCI-TL nian ne’ebé lidera husi Eis-Prezidente CCI-TL, Júlio Alfaro, loke dalan ba CCI-TL la’o too nia troka iha 2014-2018 halo ona programa hodi kria kooperasaun ho governu, banku sira iha TL inklui kria kooperasaun ho parseiru internasionál no nasionál.

Nia dehan, durante tinan lima lidera CCI-TL konsidera hetan sorte barak, tanba konsege lori setór privadu kria kooperasaun ho banku BCTL, BNCTL, ANZ, Mandiri, BNU no BRI hodi kria programa atu fó kréditu ba setór privadu sei iha prosesu nia laran.

“Lidera CCI-TL ha’u iha sorte, tanba ha’u ho ekipa Prezidente CCI munisípiu no asosiasaun emprezáriu sira konsege kria fali kooperasaun ho banku sira atu fó fali kréditu ba setór privadu”, nia hatete.

Entretantu iha parte seluk, Óscar dehan durante nia mandatu konsege kria kooperasaun ho banku BCTL, ADB, ILO no IADE no governu rasik konsege fó formasaun ba grupu emprezáriu no grupu kooperativa kuaze rihun ida liu.

“Ami konsege koopera ho banku, governu no parseiru internasionál kapasita emprezáriu rihun ida liu iha área oin-oin,” nia hatete.

Nia dehan, formasaun ba setór privadu la’ós uza CCI-TL nia osan, maibé apoia husi parseiru sira.

Óscar dehan, relatóriu ba programa sira ne’ebé hala’o ona durante 2014 too 2018 sei hala’o lansamentu durante kongresu nasionál iha tempu besik.

Programa prioridade seluk tan ne’ebé kontinua hala’o maka koopera ho governu no ajénsia internasionál sira hodi apoia nafatin setór privadu atu investe makas iha indústria ki'ik no boot, oteleira, turizmu no dezenvolve agrikultura hodi lori setór privadu labele dependénsia ba orsamentu governu nian.

Parte seluk, Óscar mós kontra makas setór privadu rai liu sira ne’ebé mai loke loja ki'ik, fa’an sate, dosi no bakso inklui fa’an ropa okupa tiha negosiante Timoroan nia direitu.

Ba problema ida ne’e, nia promete sei koopera ho governu atu regula atividade emprezáriu rai li'ur mai investe tenke kria investimentu boot hodi fó servisu ba Timoroan sira.

“Ami la konkorda emprezáriu rai liu mai loke fali kioske fa'an sasán ou tunu sate, tanba sira mai loloos atu halo investimentu boot,” dehan nia.

Óscar husu atu governu kontinua koopera ho setór privadu hodi implementa projetu governu nian hodi kontinua kapasita setór privadu hadi'a aan hodi uza osan investe fali iha TL.

Iha fatin hanesan, Prezidente ekipa susesu no atual Prezidente CCI-TL Munisípiu Kovalima, Júlio do Carmo dehan sira sei organiza kongresista kada munisípiu atu kontinua vota ba Óscar Lima.

Oras ne’e daudauk Prezidente CCI-TL Munisípiu 13 ho ho asosiasaun emprezáriu 18 komesa prepara ona atu partisipa kongresu nasionál CCI-TL.

Entretantu antes ne’e, atuál Vise-Prezidente CCI-TL, Claricia Lay mós deklara kandidata aan ba Prezidente CCI-TL hodi kompete ho Óscar Lima.

Claricia Lay dehan, nia-kandidata aan ho intensaun atu hadi'a di’ak liután programa CCI-TL nian.

Tanba ne’e, atu manan ou lakon, Claracia Lay promete sei hamutuk nafatin ho estrutura CCI-TL.

Eugénio Pereira | Independente