Amu Juvito Husu Governu Dignifika Loron Konsulta Populár

DILI, (TATOLI) – Padre Vigáriu Dioseze Dili, Juvito do Rego, iha ninia omilia husu ba governu atu dignifika loron istóriku konsulta populár 30 agustu.

ʺEma sira ne’ebé halo istória sei moris barak maibé la dignifika loron ne’e, dignifika povu nia matewen, povu nia terusʺ, akresenta amu selebrante ne’e iha igreja Motael, ohin.

Bibi atan ne’e mós triste liután, tanba autór ba istória iha TL maka la dignifika. ʺHa’u triste, tanba povu, ema Timor foin maka tinan 19, maibé haluha tiha loron ida ne’e, ukun nain sira mós haluha, ita nunka selebra loron ida ne’e ho kualidadeʺ.

Amu haktuir tinan 19 liuba povu tomak selebra festa demokrasia iha loron konsulta populár hodi deside destinu Nasaun.

Tanba ne’e, nia akresenta governu presiza selebra loron importante ne’e hodi dignifika povu nia determinasaun ba destinu Nasaun.

ʺSe loron ida ne’e laiha esperansa, hothotu hahú hosi  beiala, 1975 to’o 1999 ne’e laihaʺ, katak tan.

Ho nune’e, selebrasaun ne’e padre husu ba governu, Parlamentu Nasionál, sosiadade sivíl no seluk atu selebra loron importante ne’e.

Partisipa iha selebrasaun misa ne’e, Brigadeiru Falur Rate Laek, funsionáriu públiku, seluktan ne’ebé organiza hosi Ministériu Administrasaun Estatál.

Enkuantu membru governu, deputadu no orgaun soberanu seluk la marka prezensa iha misa ne’e, tanba debate jeneralidade orsamentu jerál estadu 2018.

Jornalista: Agapito dos Santos | Editora: Rita Almeida

Imajen: Populasaun ho antusiazmu termina okupasaun Indonézia iha Timor-Leste liuhosi konsulta populár iha tinan 19 liuba. Foto google