Ministra Negosiu Estranjeiru australiana anunsia demisaun

Ministra Negosiu Estranjeiru australiana anunsia iha loron-domingu ne'e ninian demisaun, loron rua hafoin Scott Morrison eleitu ba lider Partidu Liberal no primeiru-ministru foun, hatun tiha Malcolm Turnbull ne'ebé maka okupa kargu ne'e dezde fulan Setembru 2015.

Julie Bishop afirma katak sei fila ba okupa kargu hanesan deputada no deklara katak sei la toma "naran desizaun ida ho relasaun ho eleisaun oinmai", ne'ebé prevista ba fulan Maiu 2019.

Iha loron-seste ne'e, Turnbull sai alvu hosi dezafiu ida ba iha ninian lideransa hosi Julie Bishop (numeru rua iha Governu), hosi antigu ministru Administrasaun Interna, Peter Dutton, no Scott Morrison, ne'ebé maka iha entre apoiante sira figura sira partidu nian ne'ebé besik liu primeiru-ministru sesante.

Morison mak sei sai hanesan primeiru-ministru australianu ba dala 30 (ba dalimak iha tinan sanulu-resin-ida), konfirma mós instabilidade ne'ebé maka marka iha tinan ikus hirak ne'e hosi partidu boot rua, Traballista no Liberal.

Atual ministru Ambiente no Enerjia, Josh Frydenberg, eleitu hanesan numeru rua, ho maioria.

Morrison sei formalmente asume kargu hanesan xefe Governu hafoin nomeasaun formal hosi Governador-Jeral australianu.

SAPO TL ho Lusa