Lori veteranus rejiaun 2, Terra Mau-Bulak Cs hasoru PM Taur

DILI, (TATOLI) – Veteranus Terra Mau-Bulak ho Alin Laek hamutuk ho nia grupu hosi Vikeke no Baukau kompromete ba Primeiru Ministru Taur Matan Ruak katak sira sei apoiu governu sein rezerva.

“Funu hotu ona, se mak atu tau matan ba ami? Tanba ne’e ami aprezenta ami nia an, atu servisu saida mak iha, ami prontu tulun governu tanba  ami sei bele.”

“Ami na’in 17 husi Baukau no Vikeke halibur malu, hodi saida de’it mak bele ami halo, kuandu governu bolu ami ba servisu ami prontu fó tulun governu”, Reprezentante Veteranu Rejiaun 2 Vikeke-Baukau, António da Costa e Silva “Terra Mau Bulak” ba jornalista sira iha Palásiu Governu, Sesta, foin lalais.

Nia sujere atu governu halo fatin istóriku sira hanesan akontesimentu 3 Marsu (reestruturasaun rezisténsia armada-red) ba fatin turizmu. Maibé se bele konstrusaun fatin ne’e veteranus Baukau ho Vikeke bele konstroi bainhira governu fó fiar.

“Ami aprezenta ona proposta no hatama ona, maibé tuir Xefe Governu katak despaxu tun ba Ministériu Obras Públiku sei estuda no bainhira bele, sei entrega hodi bele hahú servisu,” Terra Mau-Bulak esplika.

“Ami la’ós atu mai buka projetu, maibé ami hakarak ami nia istória ne’e labele lakon, atu marka tan istória ba povu Timor-Leste no joven sira labele haluha loron 3 Marsu, tanba husi akontesimentu ne’e ema mate barak.”

Iha fatin hanesan Eis FALINTIL, Alin Laek hatutan, sira hato’o sentimentu ba Primeiru Ministru, Taur Matan Ruak karik bele fiar nafatin sira nu’udar liman ain lider sira ne’ebé agora daudauk kaer ukun.

“Tanba  sira kaer ona ukun, ami hakarak sai nafatin liman ain sira nia, hodi bele implementa sira nia planu ne’ebé halo ona iha ai-laran,” Alin Laek espresa nia sentimentu fiél.

Jornalista: Julia Chatarina | Editór: Manuel Pinto

Imajen: Veteranu Terra Bulak hamutuk ho ninia maluk seluk hasoru Primeiru-Ministru, Taur Matan Ruak, iha Palásiu Governu, ohin. Foto António Goncalves