Prezidente PN Simu Ona Notifikasaun Hosi TR

DILI, (TATOLI) – Prezidente Parlamentu Nasionál (PN), Arão Noe, hatete simu ona notifikasaun hosi Tribunál Rekursu (TR) kona-ba fiskalizasaun preventiva ba dekretu parlamentár númeru 1/V ne’ebé konsidera laiha inkonstitusionalidade.

“Horisehik loraik maizmenu tuku 18:00 ha’u simu notifikasaun hosi Tribunál Rekursu kona-ba konstitusionalidade ba dekretu númeru 1/V ne’ebé parlamentu aprova iha 20 jullu liu ba”, Arão Noe ba Tatoli iha parlamentu, ohin.

Nia hatutan TR deklara ona katak dekretu parlametár laiha inskonstitusionalidade, no priénse kritériu legál sira.

“Prezidente Repúblika nia rekerimentu ba Tribunál kestiona artigu tolu mak 69 kona-ba separasaun poder, artigu 115 iha númeru 3 liga ba kompeténsia própriu governu no artigu 139 ko’alia kona-ba rekursu natuarál. Maibé tuir tribunál laiha inkonstitusionalidade liga ba artigu tolu”, hateten.

Tribunál pronunsia katak artigu tolu ne’e priénse rekejitu legál sira, nune’e kabe ba Prezidente Repúblika nia kompeténsia atu promulga ka la’e.

“Agora atu promulga ka la’e ne’e kompeténsia orgaun ida-idak nian, maibé tribunál orgaun da-haat deklara ona iha nia pozisaun jurídika”, katak.

Enkuantu, Prezidente Repúblika hakarak veta polítika sei iha dalan, veta konstitusionál la iha ona, tanba tribunál deklara ona nia konstitusionalidade.

Lider másimu parlamentár fiar katak Xefe Estadu sei la halo tan veta polítika, tanba kuandu halo nia impaktu boot tebes ba Estadu nia funsionamentu.

Tuir nia kuandu Prezidente Repúblika uza kompeténsia hodi veta polítika, entaun tenke haruka fila mai parlamentu, depois halo apresiasaun.

“Atu konfirma mai parlamentu mós labele halo buat ida ona, tanba tribunál pronunsia ona rezultadu, katak laiha inkonstitusionalidade ba dekretu parlamentár 1/V”, konklui.

Jornalista: Zezito Silva | Editora: Rita Almeida

Presidente PN, Arão Noé. Foto Antonio Goncalves