Primeiru-ministru Timor nian hein aprovasaun Orsamentu iha meadus fulan Setembru

Primeiru-ministu timoroan hatete iha loron-kinta ne'e katak ninian ezekutivu serbisu hela hodi gaante estabilidade iha kontas públikas no hein katak Orsamentu Jeral Estadu nian ba tinan 2018 sei aprova iha parlamentu iha meadus fulan Setembru.

"Ami hakas an hodi buat hotu bele lao ho di'ak no osan bele sai ho tempu. Agora ne'e ha'u lakoi halo espekulasaun. Ami kumpri hela ajenda no iha fulan Setembru nian klaran orsamentu sei prontu atu haruka ba señor Prezidente", hatete Taur Matan Ruak, iha loron-kinta ne'e.

Xefe Governu ne'e koalia ba jornalista sira hafoin nia reuniaun semanal nian ho Prezidente, Francisco Guterres Lu-Olo, ne'ebé mak analiza, no mós aspetu sira seluk, debate konabá Orsamentu Jeral Estadu nian ba tinan 2018, ne'ebé halao iha Parlamentu.

"Debate ne'e sei hahú iha loron 27 Agostu", esplika Taur Matan Ruak.

Ruak hatan ba Lusa bainhira husu konabá se Estadu iha osan sufisiente ba fulan Setembru, tanba halo ona levantamentu estraordinariu ida hamutuk dolares millaun 140 ba fulan Jullu no fulan Agostu.

Fó hanoin mós katak agora daudaun ne'e Timor moris ho sistema duodésimu dezde loron 01 Janeiru no VIII Governu tenki husu fali ba parlamentu levantamentu estraordinariu ida hamutuk dolares millaun 140 hosi Fundu Petroliferu hodi haforsa kofre Estadu nian, ne'ebé maka iha inisiu fulan Jullu ne'e la iha osan.

Situasaun ne'e fó impaktu boot ida iha governasaun ne'e, ho dividas importante sira ne'ebé maka akumula hela, inklui mós setor ne'ebé fornese enerjia eletrika, ho risku 'blackout' ida iha fulan ne'e tanba falta falta diesel iha prinsipal sentral nasaun nian.

Fonte hosi Governu konfirma ba Lusa katak ezekutivu selu ona iha semana kotuk millaun hitu resin divida ida "entre millaun 25 no 30", ne'ebé permiti sentral ne'e hodi kontinua funsiona.

"Agora daudaun la iha 'blackout'", hatete Taur Matan Ruak ba Lusa.

"Ha'u hakarak agradese pesoalmente ba empreza Eto, ba Nilton Gusmão, ne'ebé maka halo esforsu boot ida hodi asegura ba fornesimentu ba kombustivel", hatete.

Husu konabá preokupasaun sidadaun sira no emprezariu sira ho situasaun nasaun nian, liu-liu iha nivel ekonomia, Matan Ruak hatudu otimista.

"Ami nian esforsu maka estabiliza no avansa ho Orsamentu Jeral Estadu nian ba tinan 2018. no tuir kedas ho tinan 2019 nian. Ne'e esforsu boot ida hodi estabiliza no avansa", hatete.

"OJE tinan 2018 ne'e hodi estabiliza, selu divida no kompromisu no tau makina hodi funsiona. Tinan 2019 nian ne'e hodi investimentu sira mós. Ha'u sente ami iha dalan ne'ebé diak, apezarde difikuldade sira", hatete.

Taur Matan Ruak hatete katak nia kontinua "ho dialogu" ho Prezidente konabá difikuldade iha tomada pose ho membru na'in sira Governus nian, ne'ebé maka indijitadu, maibé xefe Estadu ne'e seidauk fó pose.

"Senhor prezidente kontinua mantein dialogu, primeiru ministru kontinua tuir senhor Prezidente hodi bele rezolve problema ne'e", hatete.

"Ami nian pozisaun kontinua katak la iha argumentu politiku ka juridiku hodi ba substituisaun. Se señor Prezidente kontinua ho ninian pozisaun, ami mós kontinua disponivel ba dialogu hodi hetan solusaun", subliña.

SAPO TL ho Lusa