PNTL Identifika Ona Suspeitu Dezeñu Imajen Lider Istóriku

DILI, (TATOLI) – Polísia Nasionál Timor-Leste (PNTL) identifika ona suspeitu na’in haat ne’ebé durante ne’e dezeñu aat imajen lider istóriku-sira hanesan Lú Olo, Xanana, Marí Alkatiri no Taur Matan Ruak.

Nia hatutan katak evidénsia-sira ba kazu ne’e PNTL entrega ona ba Ministériu Públiku iha loron hirak liu-ba.

“Ohin dadér ha’u konfirma ida ne’e ba Serbisu Investigasaun Kriminál no sira hato’o ona mai katak kazu ne’e iha Ministériu Públiku ona. Agora, prokuradór ne’ebé toma responsabilidade ba kazu ida ne’e prosesa hela”, Komandante Jerál Polísia Nasionál Timor-Leste (PNTL), Júlio da Costa Hornay, ba jornalista sira iha Palásiu Prezidente Nicolau Lobato, Bairru Pité, kinta ne’e.

Júlio haktuir suspeita hirak ne’e timoroan no iha tempu badak PNTL sei kaer iha ida-idak nia hela fatin.

Iha biban ne’e, nia apela ba timoroan hotu atu respeita lider istóriku-sira maske diferensa polítika, tanba lider-sira ne’e autór prinsipál ba Timor-Leste nia independénsia nasionál.

Jornalista: Xisto Freitas | Editora: Rita Almeida

Imajen: Komandante Jerál Polísia Nasionál Timor-Leste (PNTL), Komisáriu Júlio da Costa Hornay